Një Airbus A320 që fluturonte nga Dublini për në Romë u devijua në Aeroportin Évreux në Normandi, të Francës, për shkak të një alarmi për bombë. Qeveria franceze konfirmoi lajmin. Avioni, i cili u nis nga Dublini në orën 6:25 të mëngjesit, u kthye prapa ndërsa ishte mbi Essonne, në jug të Parisit. Pastaj bëri disa xhiro në ajër përpara se të vazhdonte drejt bazës ajrore në Normandi. Forcat Ajrore Franceze njoftuan se avionët e tyre luftarakë u ngritën "për të shoqëruar avionin", i cili u "devijua dhe u shoqërua në Évreux". "Ne po monitorojmë situatën në kohë reale sipas procedurave", tha qeveria franceze. Zyra e kryeministrit francez tha se një njësi e skuadrës së bombave ishte në vend për të inspektuar avionin. 151 pasagjerë dhe gjashtë anëtarë të ekuipazhit në bord u zhvendosën në një vend të sigurt, tha ajo.