Politologu Ermal Hasimja e sheh përçarjen e opozitës si pengesën kryesore për një rotacion të mundshëm politik në vend. Sipas tij, kushtet për ndryshimin e qeverisjes janë të pranishme, por mungesa e një qëndrimi të përbashkët mes forcave opozitare mund të dëmtojë këtë proces.
I ftuar në emisionin “Off the Record”, nga Andrea Danglli në A2 CNN, Hasimja u ndal te zgjedhjet e ardhshme në Tiranë, duke theksuar se opozita duhet të dalë me një kandidat të vetëm.
Sipas politologut, nëse partitë opozitare garojnë me katër kandidatë të ndryshëm, avantazhi do të jetë në anën e kundërshtarit politik, i cili përfaqëson një bllok të bashkuar.
“E vetmja gjë që është jashtë logjikës dhe pengesë për ndryshimin e qeverisjes, është pjesa e përçarjes së opozitës. Nëse në zgjedhjet e ardhshme të Tiranës dilet me 4 kandidatë të opozitës, është e qartë që do fitojë kandidati i bllokut unik, që është në anën tjetër”, u shpreh Hasimja.
Ai shtoi se protesta ka krijuar një frymë pozitive dhe ka ndikuar në dobësimin e qeverisjes më shumë sesa vetë partitë opozitare, duke e cilësuar këtë moment si një mundësi për ndryshimin e pushtetit.
