Procesi zgjedhor për zgjedhjet e mesit të mandatit në Shtetet e Bashkuara ka hyrë në fazën kryesore, ku janë në lojë të 435 vendet e Dhomës së Përfaqësuesve dhe një e treta e Senatit. Të dhënat e para të numërimit pritet të mbërrijnë në mesnatë sipas orës në Shqipëri, ndërsa “rezultatet më të hershme mund të dalin pas orës 18:00 ET më 3 nëntor, kur mbyllen qendrat e votimit në disa pjesë të Indianës dhe Kentucky-t”.

Oraret kryesore të mbylljes së votimeve

Procesi i grumbullimit të të dhënave është i ndarë në disa faza kryesore sipas zonave me orare të ndryshme:

• Ora 12:00 e mëngjesit (ora në Shqipëri): Mbyllen qendrat e para në Indiana dhe Kentucky, nga ku fillojnë të dalin numrat e parë ende jo domethënës.
• Ora 1:00 e mëngjesit: Mbërrijnë parashikimet e para kryesore për shtetet që mbyllin votimin në orën 7:00 të mbrëmjes ET.
• Ora 2:00 e mëngjesit: Zhvillohet vala vendimtare e të dhënave, pasi 25 shtete mbyllin qendrat e votimit njëkohësisht në orën 8:00 të mbrëmjes ET.
• Deri në orën 7:00 të mëngjesit: Proçesi mbyllet përfundimisht me Alaskën dhe zonat e fundit (ora 1:00 e mëngjesit ET / 7:00 e mëngjesit në Itali).

Pavarësisht këtij ritmi, autoritetet theksojnë se “mund të duhet shumë më tepër kohë për të përcaktuar se kush kontrollon Dhomën e Përfaqësuesve dhe Senatin”. Votat me postë, sidomos në shtete si Kalifornia, mund të vonojnë përfundimet dhe pamja e plotë e Kongresit mund të qartësohet vetëm në ditët në vijim.

Gjykata Supreme refuzon kërkesën e administratës Trump

Në prag të hapjes së votimit, Gjykata Supreme e SHBA-së mori një vendim unanim për të hedhur poshtë kërkesën e administratës Trump për të pezulluar 20,000 fletëvotime me postë në Kaliforni. Administrata pretendoi se këto fletëvotime mund t’u ishin dorëzuar shtetasve jo-amerikanë, por “urdhri i pafirmosur dhe i pamotivuar vjen në të njëjtën ditë kur avokatët e administratës apeluan në gjykatë pasi një gjykatë federale e apelit hodhi poshtë argumentin se autoritetet e Kalifornisë duhet t’i kishin sekuestruar fletët e votimit”.

Sipas analizës së gazetës New York Times, ky vendim me shpejtësi të jashtëzakonshme i dërgon një mesazh të qartë administratës se gjykata “nuk ka ndërmend të ndërhyjë për të mbështetur përpjekjet e presidentit amerikan për të ndërhyrë në mënyrën se si shtetet individuale menaxhojnë zgjedhjet”.

Sipas Kushtetutës, administrimi i zgjedhjeve u takon shteteve individuale. Këtij parimi i janë bashkuar edhe më shumë se 100 ish-astronautë të NASA-s përmes grupit jopartiak “Astronautët për Amerikën”, të cilët kërkuan zgjedhje të lira ku “numërohet çdo votë e vlefshme”, duke nënvizuar se “përgjegjësia kryesore për zhvillimin e zgjedhjeve u takon shteteve”.

Monitorimi federal dhe zhvillimet në Shtëpinë e Bardhë

Për të garantuar rregullsinë e procesit, Departamenti i Drejtësisë i SHBA-së ka ndërmarrë “operacionin më të madh të monitorimit në historinë e tij”, duke vendosur afërsisht 1,000 vëzhgues federalë në 126 qarqe në 50 shtetet. Vëzhguesit kanë për detyrë të verifikojnë respektimin e ligjeve federale, diskriminimin e mundshëm racor dhe frikësimin e votuesve, por atyre “nuk u lejohet qasja në makinat e votimit ose fletët e votimit dhe nuk janë të përfshirë në procesin e numërimit”.

Nga ana tjetër, presidenti Donald Trump do t’i ndjekë zhvillimet nga Shtëpia e Bardhë. Presidenca ka njoftuar se ai “do të presë rezultatet e zgjedhjeve të mesit të mandatit në Shtëpinë e Bardhë, ku do të marrë pjesë në një pritje natën e zgjedhjeve në Sallën Lindore duke filluar nga ora 19:00”, një aktivitet ky që do të jetë tërësisht i mbyllur për shtypin.

/rtsh.al/