Italia planifikon taksë 26% për të pasurit që largohen nga vendi

Italia po planifikon vendosjen e një takse prej 26% mbi fitimet kapitale të parealizuara për individët e pasur që vendosin të transferojnë rezidencën jashtë vendit. Propozimi i qeverisë së Giorgia Melonit ka shkaktuar shqetësim mes të huajve të pasur që janë vendosur në Itali vitet e fundit, të tërhequr nga lehtësitë fiskale.

Sipas Financial Times, masa është përfshirë në projektbuxhetin e vitit 2027 dhe synon individët që zotërojnë aktive financiare me vlerë të paktën 800 mijë euro dhe që kanë qenë rezidentë tatimorë në Itali për të paktën gjashtë nga dhjetë vitet përpara largimit.

Propozimi ka shqetësuar veçanërisht të huajt e pasur që kanë transferuar rezidencën në Itali, të tërhequr nga regjimi i favorshëm fiskal. Sipas Financial Times, këshilltarët e pasurisë po përballen me shqetësimet e klientëve për pasojat e taksës së re, e cila mund ta bëjë shumë më të kushtueshëm largimin nga Italia.

Problemi nuk është vetëm detyrimi i mundshëm financiar, por edhe pasiguria për ndryshimet e ardhshme të politikave tatimore. Disa individë mund të përshpejtojnë largimin përpara plotësimit të periudhës gjashtëvjeçare të rezidencës, ndërsa të tjerë mund të rishikojnë planet për t’u vendosur në Itali.

E veçanta e taksës është se ajo do të zbatohet mbi fitimet e krijuara nga rritja e vlerës së investimeve, edhe nëse ato nuk janë shitur ende. Megjithatë, projektligji parashikon mundësinë e rimbursimit nëse aktivet nuk shiten për një periudhë të caktuar pas largimit.

Charlie Sosna, drejtues i sektorit të pasurisë private dhe taksave në firmën ligjore Mishcon de Reya, tha se propozimi përbën një ndryshim të rëndësishëm që po shkakton shqetësim tek klientët e vendosur në Itali.

Gjatë dekadës së fundit, Italia ka përdorur stimuj fiskalë për të tërhequr kapital dhe profesionistë nga jashtë. Në vitin 2017, vendi prezantoi një regjim të veçantë për individët e pasur që transferonin rezidencën në Itali. Ata mund të paguanin një taksë fikse vjetore prej 100 mijë eurosh për të ardhurat nga jashtë, për një periudhë deri në 15 vjet.

Por gjatë dy viteve të fundit, qeveria Meloni e ka rritur dy herë këtë taksë, duke e çuar në 300 mijë euro në vit për të ardhurit e rinj. Ndryshimet kanë shtuar shqetësimet për qëndrueshmërinë e politikave fiskale, veçanërisht mes individëve të pasur të vendosur në Milano.

Ndërkohë, përfitimet e pritshme buxhetore nga taksa e re janë relativisht të kufizuara. Sipas vlerësimeve të qeverisë, të ardhurat do të arrijnë në 3.7 milionë euro në vitin 2027 dhe pak më shumë se 6.7 milionë euro në vit gjatë katër viteve pasuese. Nga viti 2032, ato pritet të ulen në rreth 3.4 milionë euro në vit, për shkak të rimbursimeve të mundshme.

Ekspertët theksojnë se projektligji përmban ende paqartësi, përfshirë trajtimin e investimeve jashtë Italisë dhe marrëdhënien me regjimet ekzistuese të lehtësive fiskale.

Maurizio Fresca, ekspert fiskal në firmën Chiomenti, tha se këto çështje pritet të sqarohen gjatë shqyrtimit parlamentar, ku propozimi mund të ndryshojë.

Sipas Tim Stovold, drejtues i sektorit të taksave në Moore Kingston Smith, taksa mund të nxisë disa individë të largohen nga Italia përpara se të plotësojnë gjashtë vitet e rezidencës tatimore.

Nëse miratohet, masa mund të krijojë një pengesë të re për individët e pasur që e konsiderojnë Italinë si vendbanim afatgjatë, në një kohë kur vendi konkurron me destinacione të tjera europiane për të tërhequr kapital ndërkombëtar.