Një aksident rrugor me gjashtë të plagosur është shënuar në aksin Pogradec-Lin, në afërsi të fshatit Piskupat, ku dy automjete janë përplasur me njëri-tjetrin.
Sipas informacioneve paraprake, nga përplasja kanë mbetur të lënduar gjashtë persona, tre prej të cilëve ndodheshin në njërin automjet dhe tre të tjerët në makinën e dytë.
Të plagosurit janë transportuar menjëherë drejt spitalit të Pogradecit, ku po marrin kujdesin e nevojshëm mjekësor. Fatmirësisht, sipas të dhënave të para, gjendja e tyre shëndetësore është e qëndrueshme dhe nuk paraqesin rrezik për jetën.
Në vendin e aksidentit kanë mbërritur efektivët e Policisë, të cilët kanë nisur veprimet hetimore për të përcaktuar shkaqet e përplasjes dhe dinamikën e plotë të ngjarjes.
Ende nuk dihet nëse aksidenti ka ardhur si pasojë e shpejtësisë, një manovre të gabuar apo faktorëve të tjerë. Pritet që hetimet të hedhin më shumë dritë mbi rrethanat e ngjarjes.