Socialistët kërkojnë t’i lënë brenda shtëpisë së tyre përplasjet e brendshme. Deputetët Aurora Mara dhe Sara Mila nuk kanë pranuar të flasin për Report Tv, ndërsa Lindita Nikolla është mjaftuar me një “Asnjë koment”.

“Qëndrimet e mia mbi këtë përplasje i kam shprehur brenda familjes socialiste. Edhe kësaj radhe do t’i shpreh atje”, është shprehur Ervin Hoxha.

Opozita, e ka një lexim të sajin mbi letrën publike të Erion Veliajt përmes së cilës nga burgu, i shpalli luftë kryeministrit Rama.

“Këto konkretizohen tek ata pak rreshta të ditarit të Veliajt, që kryeministri është në gjendje të urdhërojë prokurorinë dhe gjykatën se si të dënojë kundërshtarët. Për të njëjtën akuzë, njëri qëndron në burg, tjetri jashtë. Zëvendëskryeministrja e akuzuar për korrupsion, prokuroria e posaçme nuk guxon ta çojë. Për mua, po bën politikë. Kjo nënkupton që SPAK-u po luan lojë, se mund ta kërkonte atë gjë pa e parë fare, ndërsa këtë tjetrin e ka përplasur aty dhe nuk e lë të dalë”, tha Oerd Bylykbashi në Komisionin e Ligjeve.

Në komisionin e ligjeve, demokrati, kërkoi që pretendimet e Veliajt se është kërcënuar me burg në emër të kryeministrit nëse nuk delegon detyrën e të pranojë përfshirjen në protestat në Tiranë, duhen hetuar.

“Ajo letër grisi edhe SPAK, edhe GJKKO. Produkti është ky: SPAK-u, me urdhër të tij, t’i rrisë akuzat dhe GJKKO-ja ta kalbë në burg. Për të njëjtën akuzë, njëri qëndron në burg, tjetri jashtë. Zëvendëskryeministrja e akuzuar për korrupsion, prokuroria e posaçme nuk guxon ta çojë. Kjo nënkupton që SPAK-u po luan lojë”, vijoi ai.

Për kreun e komisionit të Ligjeve, Ulsi Manja, sistemi i drejtësisë e ka fituar pavarësinë falë reformës 10 vite më parë, ndërsa pretendimet e opozitës, i quan politike.

“Përtej qëndrimeve politike tashmë të njohura të opozitës, se nuk është risi kjo që bëri Bylykbashi, është pjesë e një skenari të përditshëm që ka opozita, e cila, në vend të ishte alternativë e qeverisjes, është kthyer në zëdhënëse të aktualitetit të përditshëm politik e shoqëror shqiptar. Por kjo është punë e opozitës. Detyra jonë është të miratojmë buxhetin dhe ligjet që kanë të bëjnë me integrimin e Shqipërisë në BE. Nuk jemi ne një pushtet që mund të urdhërojmë një institucion të pavarur se si të bëjë detyrën e vet. Këtë e kemi zgjedhur në 2016. Në 2016, përfundimisht, kjo tryezë i hoqi duart nga drejtësia”, iu përgjigj Manja.

Përplasja Rama-Veliaj doli në sipërfaqe pas transferimit të beftë të kryebashkiakut Erjon Veliaj nga Durrësi, në burgun e Fierit me një urdhër që u konsiderua “sekret shtetëror” e që prodhoi reagime të shumta edhe brenda socialistëve, derisa u nis një verifikim nga Ministria e Drejtësisë për kushtet e transferimit.

Rendit zhvillimet sipas orarit:
Ora 14:03
Blushi: Veliaj u kërcënua, SPAK është kamzhik në duart e Ramës! Kuvendi të miratojë rezolutë për persekutimin politik në burgje (VIDEO)

 

Deputeti i PD Tedi Blushi, në Komisionin e Ligjeve, kërkoi reagim ndaj pretendimeve të Erion Veliajt se është kërcënuar në burg në emër të kryeministrit Edi Rama. Ai akuzoi SPAK-un se përdoret si “kamzhik” në duart e Ramës dhe kërkoi që komisioni t’i propozojë Kuvendit një rezolutë për atë që e cilësoi persekutim politik në burgje. 

“Do të uroja që kjo të ishte edhe shqetësimi kryesor i këtij Komision, nëse do të arrihej apo jo akordi për këtë cështje, por besoj se ky Komision, agjenda e këtij Komisioni, e kam theksuar dhe e ripërsëris, duhet të jetë garantimi i respektimit të plotë të ligjit, të Kushtetutës dhe të Konventës Europiane për të Drejtat  e Njeriut në Republikën e Shqipërisë, detyrë të cilën ju dhe ky Komision për fat të keq nuk po e kryeni.

Jemi sot në kushtet kur kapja mafjoze e shtetit po përshkallëzohet dhe ka shkuar deri aty sa po rikonfirmohen tanimë edhe nga anëtarë të partisë tuaj, akuzat e drejta të opozitës sa i përket kapjes mafjoze të shtetit dhe mbi të gjitha faktit që Drejtësia, SPAKU është kthyer në një instrument politik, fakti që sistemi penitenciar është kthyer në një institucion të persekutimit politik.

Kryetari në detyrë i bashkisë së Tiranës, Erjon Veliaj, ai të cilin edhe ju e keni përqafuar dhe e keni mbështetur edhe ju personalisht, por edhe kolegët tuaj në këtë Komision, ka denoncuar një fakt  tronditës. Në fakt, janë disa fakte tronditëse që ai ka bërë publike.

Ju nuk tronditeni se në kodet tuaja mafjoze këto janë situate normale, por të kërcënosh kryetarin e bashkisë së Tiranës, në një zyrë shteti, ti shkelësh atij të drejtat themelore dhe kjo nuk ka asnjë lidhje dhe nuk dua ta ngatërroj me qëndrimet e mia publike dhe politike ndaj tij, të cilave nuk ju heq asnjë presje, por fakti që mafja sot po ha kokën dhe ju po hani kokat e njëri – tjetrit kjo është cështja juaj, por pjesë e kësaj gostie nuk mund të bëhen të drejtat dhe liritë themelore të njeriut.

Është tronditës fakti që tanimë edhe kryetari në detyrë i bashkisë së Tiranës, i certefikuar si kryetar edhe nga gjykata, e duam apo nuk e duam Erjon Veliajn ai është sot Kryetari i bashkisë së Tiranës, ka denoncuar faktin që Ministri i Drejtësisë, në zyrat e shtetit, në emër  dhe për llogari të Edi Ramës e ka kërcënuar në rast se ai do të vijonte të mbante ato qëndrime publike që po mban, duke e paralajmëruar madje se mund të kalbej edhe 100 vite të tjera në burg.

Është kriminal fakti që ky Komision po bën spektatorin në kushtet kur institucioni apo më sakt sistemi penitenciar është kthyer në një institucion persekutimi politik. Nuk më intereson aspak lufta apo përplasja mes dy drejtuesve, deri dje kryesorë të kësaj mazhorance dhe as fakti që organizata juaj mafjoze po ha kokën apo po hani kokat e njëri – tjetrit, por ajo që më shqetëson është fakti që ky Komision vijon të bëjë sikur asgjë nuk po ndodh në vendin tonë dhe për më tepër kur shkelen në mënyrë flagrante liritë dhe të drejtat themelore të njeriut.

Kur SPAK-u po konfirmohet që ka shërbyer si kallashnikov në duart e Edi Ramës, ose si kamzhik për të fshikulluar të gjithë kundërshtarët politikë të Edi Ramës. Ndaj ju kërkoj që ky Komision të dalë me një qëndrim, në qoftë se do të keni dhe do të ngriheni në lartësinë e detyrës që ju keni dhe ky Komision do të ngrihet në lartësinë e funksionit të tij që buron nga Kushtetuta e Republikës së Shqipërisë, sepse fakti që sot jut ë gjithë po heshtni dhe që rrini këtu kokë ulur, nuk mjafton, por duhet që ky Komision të dali me një qëndrim dhe ti propozojë Kuvendit një rezolutë në lidhje me faktin që sistemi penitenciar është kthhyer në një mekanizëm cnjerëzor të persekutimit politik dhe të faktit që tanimë edhe me gojën e Erjon Veliajt, SPAK-u po përdoret si kamzhik dhe kontrollohet 100% nga Edi Rama”, tha Blushi.

SI.E./Shqiptarja.com

Ora 12:44
'Asnjë koment', socialistët heshtin për përplasjen Rama-Veliaj! Ervin Hoxha: Qëndrimet do t'i shpreh në familjen socialiste (VIDEO)

 

Përplasja mes Edi Ramës dhe Erion Veliajt i ka gjetur mjaft të rezervuar socialistët, të cilët kanë shmangur komentet për konfliktin mes kryeministrit dhe kryebashkiakut të Tiranës. Aurora Mara dhe Sara Mila nuk kanë pranuar të flasin, ndërsa Lindita Nikolla është mjaftuar me një “Asnjë koment”.

Edhe Eduard Shalsi nuk ka dhënë një qëndrim, duke shpejtuar hapat në praninë e gazetarëve me justifikimin se i duhet të jetë në komision. I vetmi që ka pranuar t'i përgjigjet pyetjeve të Report TV për këtë përplasje ka qenë Ervin Hoxha, por edhe ai ka zgjedhur të jetë i kujdesshëm.

“Qëndrimet e mia mbi këtë përplasje i kam shprehur brenda familjes socialiste. Edhe kësaj radhe do t’i shpreh atje”, është shprehur Hoxha.

 

U.D/Shqiptarja.com