Çmimet e naftës ranë me më shumë se 7% të hënën, pasi bisedimet mes zyrtarëve iranianë dhe atyre nga Katari rritën shpresat për përfundimin e luftës mes SHBA-së, Izraelit dhe Iranit, si dhe për stabilizimin e furnizimit me naftë bruto nga Lindja e Mesme, shkruan Reuters.
Kontratat e ardhshme të naftës Brent u mbyllën me një rënie prej 8,66 dollarësh, ose 7,63%, në 104,77 dollarë për fuçi. Nafta bruto amerikane West Texas Intermediate (WTI) ra me 7,66 dollarë, ose 7,36%, duke arritur në 96,46 dollarë për fuçi.
Gjatë seancës, çmimi më i ulët i Brent ishte 103,28 dollarë, ndërsa ai i WTI-së 95,15 dollarë. Disa analistë ia atribuuan këtë rënie shpresave për një përparim diplomatik, pasi presidenti iranian Masoud Pezeshkian deklaroi se Udhëheqësi Suprem, Ajatollah Mojtaba Khamenei, i kishte dhënë qeverisë disa kompetenca për zhvillimin e bisedimeve të paqes.
Pezeshkian shtoi se Teherani “do të përpiqet ta zgjidhë problemin përmes dialogut”, pa dhënë më shumë hollësi, raportuan mediat shtetërore.
Negociatorët iranianë zhvilluan disa ditë bisedimesh me ndërmjetësit nga Katari, me synimin për t’i dhënë fund luftës.
Nafta Brent e mbylli muajin tetor në nivelin më të lartë të gjashtë muajve, për shkak të shqetësimeve se konflikti në Lindjen e Mesme mund të përshkallëzohej sërish pas zgjedhjeve afatmesme amerikane të së martës.
Presidenti amerikan Donald Trump deklaroi të hënën se Irani dëshiron të arrijë një marrëveshje për t’i dhënë fund luftës dhe se një marrëveshje e tillë “mund të arrihet”.
Të hënën në mbrëmje, ndërmjetësit nga Katari udhëtuan drejt Teheranit për bisedime me ministrin e Jashtëm iranian, Abbas Araqchi, lidhur me një marrëveshje të mundshme mes SHBA-së dhe Iranit.
Shenjat e përparimit në bisedimet mes SHBA-së dhe Iranit i shtynë çmimet e naftës në rënie, tha analisti i Raymond James, Pavel Molchanov. Megjithatë, ai theksoi se skepticizmi mbetet i arsyeshëm, pas disa “shpresave të rreme” gjatë muajve të fundit.
Nafta Brent e mbylli muajin tetor në nivelin më të lartë të gjashtë muajve, për shkak të shqetësimeve se konflikti në Lindjen e Mesme mund të përshkallëzohej sërish pas zgjedhjeve afatmesme amerikane të së martës.
“Tregu i naftës vazhdon të reagojë me ndjeshmëri ekstreme ndaj çdo lajmi që vjen nga Lindja e Mesme”, tha analisti i UBS-së, Giovanni Staunovo. “Ndërsa frika për një përshkallëzim të menjëhershëm i shtyu çmimet në rritje javën e kaluar, ato kanë rënë ndjeshëm në fillim të kësaj jave, ndërsa bisedimet diplomatike mes SHBA-së dhe Iranit vijojnë”, shtoi ai.
Bisedimet u zhvilluan pas një shtimi të kohëve të fundit të sulmeve ndaj cisternave të naftës që kalojnë nëpër Ngushticën e Hormuzit. Megjithatë, janë vërejtur edhe shenja të rritjes së dërgesave nga disa prej eksportuesve kryesorë.
Eksportet e naftës bruto të Arabisë Saudite u rritën në tetor krahasuar me shtatorin, sipas dy prej tri kompanive që monitorojnë lëvizjet e anijeve, pavarësisht sulmeve të rebelëve jemenas Huthi, të lidhur me Iranin, ndaj infrastrukturës së saj energjetike.
Shpërthimi i luftës me Iranin në fund të shkurtit ka pakësuar rezervat e naftës. Bota ka konsumuar gati 1 miliard fuçi nga rezervat e saj që prej ndërprerjes së transportit detar përmes Ngushticës së Hormuzit për shkak të luftës, deklaroi Sultan Al Jaber, drejtor ekzekutiv i ADNOC-ut, kompanisë shtetërore të naftës së Abu Dhabit.
Disa analistë paralajmëruan se çmimet e naftës mund të rriten më tej. Goldman Sachs, në një raport të publikuar të dielën, deklaroi se Brent mund të arrijë në 140 dollarë për fuçi në vitin 2027, nëse prodhimi i naftës në Gjirin Persik mbetet 3,5 milionë fuçi në ditë nën mesataren e vitit 2025.
“Intensifikimi i sulmeve ndaj transportit detar, dëmtimi i infrastrukturës së naftës dhe vazhdimësia e një primi rreziku mbeten faktorët kryesorë që mund të shkaktojnë rritje të mëtejshme të çmimeve”, thuhet në raportin e bankës.
