Eric Trump, në të majtë, dhe Donald Trump Jr. janë investitorë pasivë, sipas drejtuesit të sektorit minerar që qëndron pas kësaj sipërmarrjeje
Një kompani që nxjerr tungsten dhe ka lidhje me dy djemtë e presidentit Trump po përgatitet të dalë në bursë. Ky është zhvillimi më i fundit në historinë e një biznesi që ka kërkuar financim nga qeveria dhe që është vënë nën vëzhgimin e demokratëve.
Kompania, e cila do të njihet me emrin Kaz Resources, bëri të ditur se planifikon të shesë aksione për publikun vitin e ardhshëm, përmes një listimi të drejtpërdrejtë në bursat amerikane. Kjo do t’u japë Donald Trump Jr. dhe Eric Trump një pjesë pronësie në projektin e saj në Kazakistan.
Marrëveshja e propozuar, me vlerë 2 miliardë dollarë, do t’u ofronte investitorëve një tjetër mënyrë për të mbështetur garën e Amerikës për sigurimin e materialeve jetike për prodhimin e municioneve, çipave dhe produkteve të tjera. Aseti kryesor i Kaz Resources është një minierë tungsteni e planifikuar, në pronësi të pjesshme të kompanisë shtetërore minerare të Kazakistanit. Ky projekt është thelbësor për përpjekjet e administratës Trump për të përmirësuar marrëdhëniet me një qeveri që prej kohësh ndodhet mes ndikimit të Kinës dhe Rusisë.
Kompania tha se ky plan do të zëvendësojë një bashkim në pritje, të organizuar pjesërisht nga ndërmjetësit e biznesit të vëllezërve Trump, i cili kishte shkaktuar kritika nga senatorja Elizabeth Warren (demokrate nga Massachusetts), për konfliktet e pretenduara të interesit të familjes së parë amerikane. Sipas një personi të njohur me çështjen, djemtë e presidentit pritet të mbajnë ende një pjesë pronësie në Kaz Resources, më pak se 1%. Kjo pjesë do të vlente më pak se 20 milionë dollarë nëse kompania arrin një vlerësim prej 2 miliardë dollarësh.
Djemtë Trump janë investitorë pasivë dhe nuk kanë asnjë rol në kompani, tha Pini Althaus, drejtuesi me përvojë i sektorit minerar që qëndron pas kësaj sipërmarrjeje. Një listim i drejtpërdrejtë në bursë “është një mënyrë më e pastër dhe më e shpejtë për t’u bërë një kompani e tregtuar publikisht”.
Punëtorë në minierën e tungstenit të planifikuar nga “Kaz Resources” në Kazakistan. Cove Kaz Capital Group
Kina dominon tregun e tungstenit dhe shtrëngimi i kontrolleve të eksportit gjatë viteve të fundit ka bërë që çmimet të rriten ndjeshëm. Departamenti amerikan i Mbrojtjes ka ndërmarrë hapa për të ulur varësinë nga këto furnizime, duke përgatitur një ndalim të importeve të tungstenit kinez, si dhe duke investuar 450 milionë dollarë në një prodhues amerikan.
“Nuk do të thosha se kemi arritur në pikën e panikut, por po i afrohemi asaj për sa i përket furnizimit afatgjatë me tungsten”, tha Althaus.
Kompania që do të marrë emrin Kaz Resources, e cila vlerëson se miniera e saj mund të prodhojë 15% të prodhimit global, ka nisur tashmë bisedimet për t’ua shitur metalin kompanive amerikane, sipas një personi të njohur me çështjen. Kompania po kryen një studim fizibiliteti për vendburimin dhe shpreson të nisë prodhimin në vitin 2030.
Një ish-diplomat amerikan tha se përpjekjet e Uashingtonit për të mbështetur projektin e Althaus në Kazakistan datojnë që nga administrata Biden. Në vitin 2025, administrata Trump ndihmoi në ndërmjetësimin e marrëveshjeve me qeverinë kazake, të cilat përfshinin edhe të drejtën e kompanisë së tij për të zhvilluar vendburimin. Banka e Eksport-Importit dhe Korporata e Financave për Zhvillim Ndërkombëtar kanë lëshuar letra interesi për financim deri në 1,6 miliardë dollarë.
Vendndodhja e minierës me gropë të hapur të vendburimeve të tungstenit “Northern Katpar” dhe “Upper Kairakty” në Kazakistan, të njohura kolektivisht si “Severniy Katpar”
Më vete, Eric Trump dhe Donald Trump Jr. siguruan një pjesë indirekte pronësie në projekt përmes një sërë transaksionesh të tërthorta.
Dominari Holdings, një firmë financiare me seli në Trump Tower, në pronësi të pjesshme të dy djemve, ndihmoi në drejtimin e një investimi vitin e kaluar në kompaninë e infrastrukturës Skyline Builders, me seli në Hong Kong. Më pas, Skyline ra dakord të bashkohej me asetet kazake të Althaus për të krijuar Kaz Resources, e cila do të merrte përsipër listimin e Skyline në bursën Nasdaq.
Një zëdhënës i Organizatës Trump ka deklaruar më parë se pjesa e pronësisë së djemve në projektin e tungstenit është indirekte dhe se ata nuk kanë pasur asnjë ndikim në bisedimet për marrëveshjen. Ai shtoi se qeveria kazake e kishte dhënë projektin përpara se Althaus të niste diskutimet për bashkimin me Skyline. Në një intervistë, Althaus tha se kishte mësuar për ekspozimin financiar të familjes Trump ndaj projektit të tij vetëm pasi kishin nisur këto bisedime.
Bashkimi do të anulohet në kuadër të planit të ri për ta nxjerrë Kaz Resources në bursë. Megjithatë, aksionarët e Skyline do të zotërojnë ende më shumë se një të katërtën e kompanisë pasi ajo të listohet, duke ruajtur kështu pjesët e pronësisë për investitorët, përfshirë familjen Trump.
Dominari ka rënë dakord gjithashtu të injektojë 32 milionë dollarë financim të ri në Kaz Resources përmes instrumentit të saj të investimit American Ventures. Sipas një personi të njohur me çështjen, financimi ka të ngjarë të përfshijë investitorë strategjikë që kërkojnë të sigurojnë furnizime me tungsten.
Althaus tha se do ta mirëpriste mundësinë për t’iu përgjigjur pyetjeve lidhur me projektin e tij dhe pjesën e pronësisë së familjes Trump, nëse ligjvënësit do t’i kërkonin të paraqitej në Kongresin amerikan.
“Do të habitesha nëse nuk do të ndodhte”, tha Althaus. “Këtu nuk ka asnjë provë komprometuese.”
VINI RE: Ky material është pronësi intelektuale e Wall Street Journal
