Merr frymë Partizani! Atanaskoski vendos sfidën, të kuqtë mposhtin Teutën në transfertë
Partizani ka marrë një fitore shumë të rëndësishme në transfertë, duke mposhtur Teutën me rezultatin 1-0 në stadiumin “Niko Dovana”, në sfidën e javës së 10-të të Superiores.
Heroi i të kuqve ishte Maksim Atanaskoski, i cili shënoi golin vendimtar në minutën e 59-të, duke i dhuruar skuadrës kryeqytetase tri pikë me shumë peshë në garën e kampionatit.
Pas një pjese të parë pa gola, Partizani arriti të gjente rrugën e rrjetës në pjesën e dytë, duke shfrytëzuar momentin e duhur për të marrë avantazhin. Goli i Atanaskoskit rezultoi vendimtar, pasi të kuqtë arritën ta ruanin epërsinë deri në vërshëllimën përfundimtare.
Kjo fitore merr një rëndësi të veçantë për Partizanin, që vinte në këtë përballje pas një serie rezultatesh negative dhe kishte nevojë urgjente për një reagim. Tri pikët në Durrës mund të shërbejnë si një pikënisje për rikthimin e besimit dhe përpjekjen për të dalë nga zona e fundit e renditjes.
Nga ana tjetër, Teuta pëson një humbje në shtëpi, duke humbur mundësinë për të marrë pikë përballë një kundërshtari që kërkonte me çdo kusht fitoren.
