Kryeministri izraelit, Benjamin Netanyahu, po përpiqet të vërë në pikëpyetje rezultatin e zgjedhjeve parlamentare të 27 tetorit, pasi koalicioni i tij humbi shumicën në Knesset. Netanyahu dhe partia e tij, Likud, kanë akuzuar partitë arabe për manipulim të votave dhe ndërhyrje të mundshme nga jashtë, por deri tani nuk kanë paraqitur prova që të vërtetojnë pretendimet për manipulim sistematik.
Rezultatet përfundimtare i dhanë bllokut të Netanyahut 53 mandate në parlamentin me 120 vende, ndërsa opozita e drejtuar nga Gadi Eisenkot siguroi 48. Partitë arabe fituan gjithsej 19 mandate, duke arritur rezultatin e tyre më të lartë historik. Nëse bashkohen me opozitën, kjo e fundit mund të arrijë në 67 deputetë, mbi shumicën prej 61 vendesh që nevojitet për formimin e qeverisë. Megjithatë, bashkëpunimi mes tyre mbetet politikisht i ndërlikuar.
Pretendimet për manipulim nisën që përpara votimit. Netanyahu dhe aleatët e tij njoftuan vendosjen e rreth 2 mijë vëzhguesve në qendrat e votimit në komunitetet arabe. Ditën e zgjedhjeve, policia arrestoi tre aktivistë të lidhur me partinë arabe Ra’am, të dyshuar për përfshirje në një skemë të blerjes së votave. Më pas, Likud e përdori këtë rast për të ngritur dyshime mbi vlefshmërinë e rezultatit. Dy prej të arrestuarve janë liruar, ndërsa për një tjetër janë vendosur masa kufizuese.
Megjithatë, pretendimet e Netanyahut janë kundërshtuar nga drejtuesit e institucioneve përgjegjëse. Kreu i Komisionit Qendror të Zgjedhjeve, Noam Sohlberg, deklaroi se edhe nëse dyshimet për ndërhyrje të huaj do të vërtetoheshin, ato nuk do të cenonin integritetin e procesit në tërësi dhe as rezultatin e zgjedhjeve. Në një deklaratë të përbashkët, qëndrimin e tij e mbështetën edhe prokurorja e përgjithshme dhe drejtuesi i shërbimit të brendshëm të sigurisë, Shin Bet.
Pavarësisht këtyre qëndrimeve, Netanyahu dhe aleatët e tij kanë vijuar të kërkojnë hetime për pretendimet e tyre, ndërsa disa përfaqësues të së djathtës kanë shkuar deri në kërkesën për arrestimin e drejtuesve të partive arabe dhe anulimin e zgjedhjeve.
Nga ana tjetër, opozita e ka cilësuar këtë qëndrim si një përpjekje për të delegjitimuar rezultatin dhe për të penguar mundësinë e bashkëpunimit mes forcave politike hebraike dhe atyre arabe. Sipas kundërshtarëve të kryeministrit, një aleancë e tillë mund t’i japë fund qeverisjes së gjatë të Netanyahut.
Izraeli ndodhet tashmë përballë një ngërçi politik. Asnjë nga dy blloqet kryesore nuk ka siguruar i vetëm shumicën, ndërsa partitë arabe kanë fituar një rol vendimtar në negociatat për formimin e qeverisë së ardhshme.