Kompania italiane “Renco”, e përfshirë në marrëveshjen për dhënien me qira të dy termocentraleve lundruese në Vlorë, është shpallur fituese e tenderit të Korporatës Elektroenergjetike Shqiptare (KESH) për operimin dhe mirëmbajtjen e tyre. Procedura, me fond limit prej 1.85 miliardë lekësh, ose mbi 23 milionë euro, është zhvilluar mes konkurrencës së kufizuar, pasi operatori tjetër pjesëmarrës është skualifikuar për mungesë të përvojës së ngjashme.
Tenderi për “Operim dhe Mirëmbajtje e Asetit Gjenerues Termik, Vlorë” është shpallur në gusht të këtij viti nga KESH, nën drejtimin e Viola Haxhiademit. Dy termocentralet lundruese, të njohura si “Tigrat”, ndodhen të ankoruara në zonën e Triportit në Vlorë.
Renco është një prej kompanive të huaja të përfshira në marrëveshjen e vitit 2022 me qeverinë shqiptare për dhënien me qira të dy centraleve gjeneruese të energjisë elektrike. Marrëveshja u nënshkrua mes KESH-it dhe bashkimit të kompanive “Excelerate” dhe “Renco”, ndërsa qiraja ditore për dy termocentralet raportohet të ketë qenë rreth 95 mijë dollarë.
Pas kësaj marrëveshjeje, Renco krijoi në Shqipëri edhe degën e saj, “Renco Spark”, e cila është përfshirë në procedurën aktuale të prokurimit.
Në garë ka marrë pjesë edhe një operator tjetër, i cili kishte paraqitur ofertën më të ulët. Megjithatë, KESH-i e ka skualifikuar këtë kompani me argumentin se “nuk plotëson kriterin e përvojës së ngjashme”.
Ky kriter ka kufizuar konkurrencën në procedurë, pasi Renco është kompania e përfshirë më parë në operimin e termocentraleve lundruese në Shqipëri. Kjo ngre pikëpyetje mbi konkurrencën reale në tender dhe mënyrën e përcaktimit të kritereve për një kontratë me vlerë mbi 23 milionë euro.
Marrëveshja e vitit 2022 për marrjen me qira të dy termocentraleve ka qenë objekt debatesh, ndërsa tenderi i ri për mirëmbajtjen e tyre rikthen vëmendjen te kostot që lidhen me këto asete dhe transparenca në përdorimin e fondeve publike.syri
