Një 59-vjeçar ka humbur jetën dhe tre persona të tjerë kanë mbetur të plagosur pasi kanë rënë në kontakt me rrymën elektrike gjatë punimeve në afërsi të fshatit Bujan, në Tropojë.
Ngjarja ka ndodhur rreth orës 10:00, në rrugën e Dobravës, ku katër punonjës të Bashkisë Tropojë po kryenin punime për shpërndarjen dhe vendosjen e shtyllave të ndriçimit.
Sipas informacionit paraprak të Policisë, gjatë vendosjes së një shtylle në bazament, për shkak të peshës së saj, katër punonjësit që po e mbanin kanë humbur ekuilibrin. Shtylla ka prekur telat e energjisë elektrike, duke përcjellë rrymën te punonjësit.
Si pasojë e kontaktit me energjinë elektrike, shtetasi M. S., 59 vjeç, ka humbur jetën.
Ndërkohë, tre punonjësit e tjerë, A. D., 40 vjeç, I. D., 47 vjeç dhe A. A., 21 vjeç, ndodhen në Spitalin e Bajram Currit, ku po marrin trajtim mjekësor.
Nga veprimet paraprake rezulton se punonjësit po kryenin transportin dhe shpërndarjen e shtyllave, në zbatim të planit të punës së datës 4 shtator 2026 të Bashkisë Tropojë, Drejtorisë së Turizmit, Shërbimeve Publike dhe Transportit.
Grupi hetimor po vijon veprimet procedurale për të sqaruar plotësisht rrethanat dhe shkaqet e ngjarjes.
