Në Gjermani, një pako cigare kushton aktualisht rreth 8 euro, por kjo mund të ndryshojë pasi Bundestagu votoi për të rritur gradualisht taksat e duhanit. Bazuar në llogaritjet pas legjislacionit të propozuar, çmimet për një pako cigare pritet të rriten në 8.77 euro nga viti 2027, 9.56 euro nga viti 2028, 10.42 euro nga viti 2029 dhe 11.36 euro nga viti 2030. Disa cigare të markave premium mund të kushtojnë deri në 14 euro, ndërsa edhe pakot me duhan do të bëhen dukshëm më të shtrenjta. Pavarësisht rritjes, cmimi i cigareve në Gjermani mbetet ende poshtë atij në disa nga tregjet më të shtrenjta të kontinentit, duke përfshirë Irlandën, Francën dhe Holandën. Me rritjen e planifikuar, qeveria gjermane synon të mbledhë 12 miliardë euro shtesë gjatë katër viteve. Megjithatë, industria e duhanit ka shprehur dyshime se qeveria do të mund tyë mbledhë në të vërtetë aq të ardhura sa shpreson, me përfaqësuesit e industrisë që paralajmërojnë se taksat më të larta mund t'i shtyjnë duhanpirësit gjithnjë e më shumë drejt tregut të zi ose drejt cigareve më të lira nga vendet e tjera të BE-së. Shitësit me pakicë të duhanit mund të jenë ndër ata që do të goditen më rëndë. Sipas të dhënave, rreth 19% e personave të moshës 15 vjeç e lart në Gjermani pinë duhan. Rreth 14% pinë rregullisht dhe 5% herë pas here. Qendra Gjermane e Kërkimit të Kancerit thotë se rreth 131,000 njerëz vdiqën nga sëmundjet që lidhen me duhanin në vitin 2023. Ekspertët e shëndetit i konsiderojnë çmimet më të larta si një mjet efektiv për të inkurajuar njerëzit të lënë duhanin.