Presidenti amerikan Donald Trump hoqi dorë nga planet për të transmetuar drejtpërdrejt ekzekutimin e ish-majorit të Ushtrisë që vrau 13 persona në Fort Hood, duke përmbysur vendimin e shefit të Pentagonit Pete Hegseth të enjten, pasi propozimi shkaktoi kundërshtime nga republikanët, udhëheqësit fetarë dhe publiku. Ky ndryshim i dha fund një plani për të transmetuar ekzekutimin e Nidal Hasan më 3 dhjetor. Ai shënoi gjithashtu një mosmarrëveshje të rrallë publike mes Trump dhe një prej aleatëve më të ngushtë të tij. Hegseth kishte njoftuar plane për të transmetuar drejtpërdrejt ekzekutimin në bazën ushtarake Fort Hood në Teksas, vendi i sulmit të Hasan në vitin 2009. Asnjë vend tjetër në botë nuk transmeton live ekzekutimet. Trump dhe këshilltarët e tij nuk ishin në dijeni të planit të transmetimit të drejtpërdrejt, tha një zyrtar i Shtëpisë së Bardhë duke folur në kushte anonimiteti. "Mendoj se transmetimi i ekzekutimit për të gjithë mund të ketë qenë një pengesë e fortë për botën që të dëshmonte se si Amerika i trajton terroristët dhe llumin si Hasan, por shumë njerëz shumë të mirë dhe me qëllime të mira do të preferonin të mos e shihnin atë të vdiste, përmes transmetimit", shkroi Trump në një postim në rrjetet sociale. "Ai do të vdesë, siç është planifikuar, nga skuadra e pushkatimit, por kjo ngjarje nuk do të transmetohet." Familjet e viktimave të Hasanit do të jenë në gjendje ta ndjekin ekzekutimin personalisht nëse duan, siç ndodh zakonisht me ekzekutimet në SHBA. Një juri ushtarake e shpalli fajtor Hasanin – ish-psikiatër në Ushtrinë Amerikane – për vrasje me paramendim, pasi ai qëlloi për vdekje 13 ushtarë të paarmatosur dhe plagosi 32 të tjerë brenda një objekti mjekësor në bazën e madhe ushtarake. Forcat e rendit e qëlluan Hasanin gjatë sulmit të tij, duke e paralizuar nga beli e poshtë; tashmë ai përdor një karrocë invalidësh.