Zv/kryeministrja Albana Koçiu ka reaguar lidhur me situatën e tensionuar në Tiranë, duke bërë thirrje për qetësi, vetëpërmbajtje dhe maturi, ndërsa ka paralajmëruar për pasojat që mund të sjellë dhuna dhe shkatërrimi i pronës publike e private. Në mesazhin e saj, Koçiu kujton se Shqipëria e ka paguar shtrenjtë kaosin në të kaluarën, duke theksuar se sulmet ndaj institucioneve, shkatërrimi i pronës dhe krizat e shkaktuara nga përplasjet kanë sjellë kosto të mëdha për zhvillimin, stabilitetin dhe besimin në vend. Duke iu referuar pamjeve të dhunës, flakëve dhe përplasjeve në kryeqytet, zv/kryeministrja nënvizon se kufiri mes protestës paqësore dhe kaosit është i brishtë.
Postimi i plotë
Shqipëria e ka paguar jashtëzakonisht shtrenjtë faturën e kaosit në të kaluarën, ku në emër të zemërimit dhe revoltës, u sulmuan institucione, u shkatërrua prona dhe vendi u zhyt në një krizë që i kushtoi shumë vite zhvillimi, stabiliteti dhe besimi. Pasojat e atij kaosi e mbajtën vendin peng për dekada, duke lënë plagë që i ndiejmë ende sot.
Pamjet e dhunës, flakëve dhe përplasjeve në Tiranë, na kujtojnë se sa e brishtë është vija që ndan protestën paqësore nga kaosi.
Në këto orë duhet qetësi, vetëpërmbajtje dhe maturi. Institucionet janë pasuri publike, bizneset janë puna e dikujt, rrugët janë të të gjithëve dhe siguria është e drejtë e çdo qytetari.
Shqipëria nuk ka nevojë të digjet për të ndryshuar. Ka nevojë të ndërtojë, të përparojë dhe të mbrojë atë që ka arritur.