Ministri i jashtëm Ferit Hoxha ka dënuar deklaratën e ministrit serb Ivica Dacic, i cili gjatë një fushate elektorale deklaroi se “flamuri serb do të valvitet mbi Prizren”. Teksa e quan retorikë kërcënuese për përfitime politike, Hoxha thotë se ngjarja e Banjskës, për të cilën ende nuk është vendosur përgjegjësia e plotë, mbetet një kujtesë e fortë e asaj që mund të ndodhë kur fjalët kthehen në veprime. “Shqipëria mbetet thellësisht e bindur se e vetmja rrugë përpara, sado e vështirë të jetë, kalon përmes marrëdhënieve të fqinjësisë së mirë, bashkëpunimit rajonal dhe përpjekjeve të sinqerta për të shëruar plagët e së kaluarës dhe për të ecur drejt pajtimit. Megjithatë, nuk mund të ketë bashkëpunim të qëndrueshëm rajonal për sa kohë mohohen realitetet, vihet në pikëpyetje legjitimiteti i fqinjëve apo përdoret retorika kërcënuese për përfitime politike”-thotë ndër të tjera ministri. Hoxha tekson se republika e Kosovës është realitet i pakthyeshëm, si shtet sovran dhe demokratik. Më herët kjo deklaratë u dënua edhe nga ish- ministri gjerman i Shtetit për Evropën, Michael Roth. Edhe Ministri i Punëve të Jashtme dhe Diasporës Glauk Konjufca tha se një retorikë e tillë dëshmon se ambiciet territoriale të Beogradit janë larg së qenit një çështje e së kaluarës.