Deputetja e PS-së, Elisa Spiropali ka kritikuar mënyrën sesi po trajtohet Reforma Territoriale, duke argumentuar se fokusi nuk duhet të jetë vetëm te numri i bashkive, por te kompetencat dhe autonomia që ato duhet të kenë. Gjatë fjalës së saj në Kuvend, Spiropali tha se ndryshimi i hartës territoriale nuk mjafton nëse nuk shoqërohet me decentralizim real dhe më shumë përgjegjësi për pushtetin vendor.
“Reforma Territoriale nuk është një reformë, sepse problemi nuk është sesa bashki kemi, por pyetja është sesa pushtet duhet të kenë bashkitë. Sa kompetenca, sa financa, sa përgjegjësi u takojnë komuniteteve lokale”, deklaroi ajo. Spiropali ngriti gjithashtu shqetësimin për raportin mes pushtetit qendror dhe atij vendor, duke kërkuar që kryetarët e bashkive të kenë më shumë autonomi në ushtrimin e funksioneve të tyre.
“Kryetarët e bashkive nuk mund të trajtohen as si prefekt, as si drejtorë komunale, as si elementë të rëndësishëm të partisë në pushtet. Duhet t’u japim atyre kompetencat, peshën, përgjegjësinë”, tha deputetja socialiste. Ajo kritikoi edhe praktikën e thirrjes së kryebashkiakëve në takime si të ishin vartës të pushtetit qendror.
“Ata s’mund të thirren nëpër takime dhe të trajtohen sikur janë vartës”, u shpreh Spiropali. Në fjalën e saj, deputetja socialiste kërkoi që reforma të shkojë përtej ndryshimit të hartës administrative dhe të prekë mënyrën se si ushtrohet pushteti në vend. Spiropali u distancua gjithashtu nga qëndrimet triumfaliste brenda Partisë Socialiste, duke thënë se qëllimi nuk duhet të jetë kontrolli i të gjitha bashkive. “Nuk duhet ne t’i fitojmë të gjitha bashkitë. Shqipërisë i duhet më pak përqendrim pushteti dhe i duhet një shtet më i fortë se individët”, tha ajo.
Spiropali u shpreh se forcimi i institucioneve duhet të jetë një objektiv më i rëndësishëm se forcimi i individëve që ushtrojnë pushtetin. “Duhet që institucionet tona të jenë më të forta se njerëzit që ushtrojnë pushtetin”, theksoi deputetja. Spiropali tha se institucionet dhe partitë politike po përballen me një krizë besimi. “Në këtë Parlament po bëhet teatër. Kemi jashtë njerëz që protestojnë, kemi një mungesë kohezioni, besimi te institucionet, te partitë politike, te ne që jemi këtu”, deklaroi ajo. Sa i përket qëndrimit të saj ndaj deputetëve socialistë që mund të votojnë kundër propozimit të PS-së për Reformën Territoriale, Spiropali ka deklaruar se nuk do të votojë për përjashtimin e tyre nga grupi parlamentar.