Banka e Shqipërisë ka dërguar një grup inspektorësh për të hetuar incidentin në të cilin u përfshi Banka Raiffeisen ditën e diel, në datën 4 tetor. Inspektorët mbërritën në zyrat qendrore të Raiffeisen paraditen e së mërkurë për të kontrolluar dhe për të hetuar shkakun e transaksioneve të paautorizuara nga klientët në llogaritë e tyre. Dyshimet e para janë për një anomali që ka ardhur gjatë përditësimit të sistemit me veprimet e klientëve të bankës në datat 1, 2, 3 dhe 4 tetor. Anomalia shkaktoi panik te qytetarët e prekur, që panë që për çdo veprim t’u tërhiqeshin nga dy herë paratë në llogari. Numri i klientëve të prekur dyshohet se është nga 40 deri në 50 mijë. Anomalia u korrigjua ditën e hënë dhe llogaritë bankare të klientëve që u prekën u rikthyen në gjendjen e tyre reale. Megjithatë, incidenti po hetohet nga Banka e Shqipërisë nëse janë ndjekur protokollet e sigurisë nga Raiffeisen përgjatë përditësimit të sistemeve të saj, sidomos me kalimin e plotë në ‘Cloud’, që vetë Raiffeisen e njoftoi në datën 17 shtator.