Kryeministri Edi Rama ka komentuar hetimet që lidhen me Shërbimin Informativ të Shtetit (SHISH), gjatë konferencës së përbashkët për shtyp me presidenten e Komisionit Europian, Ursula von der Leyen. Duke iu referuar kritikave të opozitës dhe kundërshtarëve politikë ndaj qeverisë, Rama tha se zhvillimet që në Shqipëri paraqiten si shenja regresi, sipas tij, vlerësohen ndryshe nga institucionet europiane.
”Pyesni veten pse BE-ja, KE-ja, ngjarje që këtu trajtohen si arsye për të goditur e për të përhapur valë dëshpërimi, i sheh si arsye për ta konsideruar Shqipërinë partner shumë serioz dhe vend që aspiratat e veta i ka të lidhura me përpjekje të përditshme dhe prova të një lufte pa kompromis ndaj krimit të organizuar dhe korrupsionit”, deklaroi Rama.
Kryeministri u ndal edhe te mënyra se si është trajtuar publikisht çështja e SHISH-it. Sipas tij, ajo që kundërshtarët e qeverisë e konsiderojnë regres, nga Komisioni Europian shihet si progres. ”Ajo që këtu nga shumëkush shihet si regres, nga KE-ja shihet si progres. Për mua është transformim”, tha ai. Rama kritikoi gjithashtu publikimin dhe qarkullimin e materialeve të lidhura me çështjen, duke theksuar se deri tani, sipas tij, nuk ka pasur materiale të ardhura nga partnerët ndërkombëtarë.
”Nga shpërndarësit dhe agjitatorët e materialeve të nxjerra rrugëve nuk na ka ardhur deri tani asnjë material nga një partner”,tha kryeministri. Sa i përket hetimeve, Rama tha se pret që institucionet e drejtësisë të vijojnë punën dhe që përfundimi i çështjes të përcaktohet nga procesi gjyqësor. “Ajo që i është bërë shërbimit me atë metodë që u trajtua çështja është e paprecedentë në historinë e botës, por është sërish pjesë e një procesi. Unë nuk pres asgjë më shumë dhe asgjë më pak që prokurorët të bëjnë punën e vet, gjykata të bëjë punën e vet dhe në fund do të dalë i patrazuar rezultati”, deklaroi Rama.
