Qeveria gjermane ka hartuar një plan me 37 masa për të luftuar abuzimin dhe mashtrimet me ndihmat sociale. Paketa, e përgatitur nga Ministria e Punës dhe Ministria e Brendshme, parashikon kontrolle më të forta, shkëmbim më të gjerë të të dhënave mes institucioneve dhe përdorimin e inteligjencës artificiale për identifikimin e rasteve të dyshuara.
Ministrja e Punës, Bärbel Bas, deklaroi se qeveria nuk do të tolerojë keqpërdorimin e sistemit të përfitimeve sociale dhe do të përdorë të gjitha mjetet ligjore në dispozicion.
Një pjesë e planit lidhet me raste të dyshuara mashtrimi të lidhura me emigrantë nga vende të BE-së, përfshirë Bullgarinë dhe Rumaninë. Autoritetet pretendojnë se në disa raste përdoren punësime fiktive ose me të ardhura shumë të ulëta për të përfituar ndihma.
Masat përfshijnë edhe kontrolle më të rrepta të adresave të banimit, luftën ndaj punës së padeklaruar dhe sanksione më të forta për punëdhënësit. Qeveria synon gjithashtu përdorimin e sistemeve të inteligjencës artificiale dhe lidhjen e të dhënave mes institucioneve.
Plani pritet të miratohet gjatë këtij muaji, ndërsa zbatimi mund të nisë deri në fund të vitit.