Kreu i Partisë Demokratike, Sali Berisha, ka komentuar vendimin e Gjykatës Speciale në Hagë për ish-krerët e UÇK-së, gjatë një interviste në emisionin “Opinion” në Tv Klan.
Berisha tha se e kishte ndjekur vendimin dhe vlerësoi se dënimet ndaj ish-përfaqësuesve të UÇK-së janë veçanërisht të rënda, duke e lidhur këtë me historinë e luftës në ish-Jugosllavi.
“Unë e ndoqa vendimin. Unë nuk di një rast të dytë, që ata që qëndruan për çlirim, liri e dinjitet dënohen njësoj apo më rëndë sesa agresorët. Këto janë dënimet më të rënda që janë dhënë për luftën në ish-Jugosllavi. Populli i Kosovës ka qenë populli më i viktimizuar, i agresuar, i shtypur”, tha Berisha.
Duke folur për përmbajtjen e vendimit ndaj katër ish-krerëve të UÇK-së, Berisha e cilësoi atë si të vështirë për t’u kuptuar dhe ngriti pikëpyetje mbi bazën ligjore të çështjes.
“Të them të vërtetën, duke u përpjekur ta kuptoj, një kaos i vërtetë! I paimagjinueshëm, kaos ligjor! Gjykata do ngrihej për akuzat e tmerrshme të Dick Martyt, por se kjo akuzë doli shpifje”, shtoi kreu i PD-së.