Një gjykatë në Paris i ka dhënë Kim Kardashian një dëmshpërblim simbolik prej vetëm 1 euroje për grabitjen me armë që pësoi në kryeqytetin francez në vitin 2016.
Shuma ishte pikërisht ajo që ylli televiziv kishte kërkuar përmes avokatëve të saj, duke theksuar se qëllimi i procesit ishte vendosja e drejtësisë dhe jo përfitimi financiar.
Ngjarja ndodhi më 2 tetor 2016, gjatë Javës së Modës në Paris. Dy persona të maskuar si policë hynë në suitën e Kardashian në “Hôtel de Pourtalès”, e lidhën dhe i morën bizhuteri me vlerë më shumë se 6 milionë dollarë, përfshirë një unazë diamanti.
Tetë persona u dënuan për grabitje me armë, rrëmbim dhe bashkëpunim në grup kriminal. Për shkak të kohës së kaluar në paraburgim, asnjëri prej tyre nuk u rikthye në burg.
Në një deklaratë, Kardashian tha se e kujton grabitjen si një nga përvojat më të tmerrshme të jetës dhe se ngjarja i ka lënë pasoja të thella psikologjike.
Edhe stilistja e saj, Simone Harouche, e cila ishte e pranishme gjatë grabitjes, mori 1 euro dëmshpërblim.
Gjykata caktoi gjithashtu 109,516 euro për recepsionistin e hotelit dhe 50 mijë euro për vetë hotelin.