Bashkëkryetari socialist i Komisionit për Reformën Territoriale, Arbjan Mazniku, ka shpjeguar arsyet e propozimit për uljen e numrit të bashkive nga 61 në 46. Sipas tij, shumë bashki nuk arrijnë të ushtrojnë të gjitha funksionet për shkak të mungesës së burimeve njerëzore dhe financiare.
“Ne kemi bërë një analizë të detajuar për të vlerësuar situatën e bashkive. Qëllimi është krijimi i eficencës administrative, që një bashki të ketë mundësi t’i ushtrojë siç duhet funksionet që ka”, tha Mazniku.
Ai përmendi si shembuj Rrogozhinën dhe Divjakën, duke theksuar se mungesa e një bërthame urbane e vështirëson funksionimin e tyre. “Nëse s’ke njerëzit dhe mundësinë ekonomike për kryerjen e funksioneve, në atë moment ti ke një problem funksionaliteti”, u shpreh ai në ”Report Tv”.
Mazniku garantoi se reforma nuk do të prekë shërbimet e përditshme për qytetarët. “Pa i larguar asnjë nga shërbimet e përditshmërisë, mirëmbajtja e rrugës, pastrimi, do të bëhen prapë nga qyteti. Lëvizin vetëm zyrat e planifikimit”, tha ai.
Në përfundim, Mazniku tha se reforma duhet të pasohet nga një rishikim i ligjit për funksionet bashkiake. “Kjo reformë ka nevojë për fazën e dytë të saj… pas 10-11 vitesh është koha të shikojmë nëse këto funksione u zbatuan apo jo. Ne do të hyjmë në zgjedhje me 46 bashki. Kjo është një reformë për qytetarët, jo për ofiqarët”, përfundoi ai.