Shtëpitë në Gojan të Pukës janë përfshirë nga flakët, duke krijuar një situatë të rrezikshme për banorët. Disa banesa janë djegur, ndërsa fatmirësisht nuk raportohet për persona të lënduar.
Me afrimin e flakëve, autoritetet urdhëruan evakuimin e zonës. Banorët qëndruan deri në momentet e fundit pranë banesave të tyre, duke marrë me vete vetëm disa sende personale, përpara se të largoheshin me shpejtësi për t’i shpëtuar zjarrit.
Përkohësisht, banorët e evakuuar do të strehohen në konviktin e qytetit të Pukës, ku, sipas njoftimit zyrtar, do t’u sigurohen ushqim dhe shërbim shëndetësor në rast nevoje.
Ndërkohë, në Gojan vijojnë përpjekjet për vënien nën kontroll të flakëve. Në terren janë angazhuar dhjetëra forca zjarrfikëse dhe efektivë të Forcave të Armatosura, ndërsa nga ajri helikopterët po ndërhyjnë duke hedhur ujë në zonat më të vështira për t’u aksesuar.
Shkaqet e zjarrit ende nuk janë përcaktuar, ndërsa kryetari i Bashkisë Pukë nuk e ka përjashtuar mundësinë e zjarrvënies së qëllimshme.
Vatra zjarri janë raportuar edhe në zona të tjera të vendit, përfshirë Dukatin e Vlorës, Mal-Milot në Kurbin dhe malin e Dajtit në Tiranë.m.k
