Sokrat Vata, 29-vjeçari nga Hasi që po kërkohet nga Policia si i dyshuari kryesor për vrasjen e turistit francez Miguel Mendes, rreth 20 vjeç, në Ksamil, rezulton të ketë pasur më herët probleme me drejtësinë jashtë vendit.
Sipas raportimeve, Vata është arrestuar dhe dënuar më parë në Britaninë e Madhe, për një sërë veprash penale, përfshirë trafikimin e lëndëve narkotike dhe drejtimin e rrezikshëm të automjetit.
Një nga rastet lidhet me një ndjekje nga Policia në Kembrixh. Më 30 prill, efektivët e pikasën Vatë duke drejtuar një automjet tip “Toyota”, i cili rezultonte i vjedhur. Ai tentoi të largohej, ndërsa gjatë ndjekjes hodhi një pako me kokainë në shkurre, por u kap nga policia. Gjatë kontrollit iu gjetën edhe 560 paund, ndërsa testi rezultoi pozitiv për drejtim automjeti nën efektin e drogës.
Një tjetër episod është regjistruar në Kent, më 13 prill, kur Vata dyshohet se nuk iu bind urdhrit të policisë për të ndaluar dhe u përplas me një automjet me targa të klonuara. Në mjet u gjetën qese me kokainë dhe targa.
Vata u dërgua përpara Gjykatës së Kurorës së Kembrixhit, ku pranoi akuzat për posedim të drogës së klasit A me qëllim furnizimin, drejtim të rrezikshëm të automjetit, posedim kanabisi dhe drejtim nën efektin e drogës.
Për këto vepra, ai u dënua me 5 vite burg.
Ndërkohë, në Shqipëri, Policia vijon kërkimet për lokalizimin dhe kapjen e Sokrat Vatës, i cili dyshohet se pas një konflikti në Ksamil ka goditur me thikë turistin francez Miguel Mendes, duke i shkaktuar vdekjen.a.b
