Kryeministri Edi Rama ka deklaruar pas takimit me drejtuesit politikë dhe anëtarët e qeverisë në Pogradec se janë konsoliduar disa prej prioriteteve për vitin e dytë të mandatit qeverisës.
Rama tha se në fokus të diskutimeve kanë qenë marrëdhënia qytetar-shtet, programet e reja të qeverisë dhe qasja e re e Partisë Socialiste në territor përmes konceptit të “Pranisë Besnike”.
Një nga projektet e prezantuara është “Pasqyra Albania”, e cila, sipas Ramës, do të shërbejë si një dritare unike ku qytetarët do të mund të ndjekin në kohë reale kërkesat dhe problematikat e tyre, si dhe ecurinë e punëve dhe projekteve publike.
Rama tha se “Besa” do të jetë në themel të raportit të ri mes shtetit dhe qytetarit, duke e përkufizuar atë përmes katër elementëve: besimit, empatisë, shërbimit dhe angazhimit.
Në programin e vitit të dytë, kryeministri veçoi programin e strehimit, si dhe një sërë nismash në sektorët e shëndetësisë dhe arsimit. Ai paralajmëroi gjithashtu një plan për rritjen e transparencës mbi çmimet e ushqimeve bazë.
Duke folur për protestat, Rama tha se protesta qytetare e zhvilluar më herët e ka sfiduar realisht qeverinë, ndërsa u shpreh se protestën që vijon aktualisht e konsideron “një gjë krejt tjetër”.
Në fund, kryeministri deklaroi se Shqipëria “nuk ka qenë kurrë më mirë” dhe se vendi është më i vlerësuar ndërkombëtarisht dhe me më shumë mundësi për zhvillim.m.k
