Ndërhyrja e menjëhershme e Policisë ka parandaluar një konflikt të mundshëm mes disa grupeve të miturish në zonën e Kombinatit në Tiranë.
Në kuadër të operacionit, 28 të mitur, të moshave 13 deri në 17 vjeç, janë proceduar në gjendje të lirë, ndërsa gjatë kontrollit fizik të disa prej tyre janë gjetur dhe sekuestruar 5 armë të ftohta dhe mjete të mprehta.
Shërbimet e Komisariatit të Policisë Nr. 6, në bashkëpunim me Forcën e Posaçme “Shqiponja”, morën informacion në rrugë operative se disa grupe të miturish do të përfshiheshin në një konflikt.
Policia ndërhyri menjëherë dhe lokalizoi në rrugën “Llambi Bonata” disa të mitur të ndarë në grupe. Ata u shoqëruan në Komisariatin e Policisë Nr. 6 për verifikime të mëtejshme.
Gjatë kontrollit, disa prej të miturve iu gjetën thika, kaçavida dhe maska, të cilat u sekuestruan në cilësinë e provës materiale.
Veprimet procedurale ndaj të miturve u kryen në prani të prindërve dhe psikologëve. Pas komunikimit me prokurorin, për 28 të miturit nisi procedimi në gjendje të lirë.a.b
