Ka nisur marshimi drejt Kryeministrisë në Tiranë, në kuadër të protestës së 78-të kundër qeverisë. Protestuesit kërkojnë dorëheqjen e kryeministrit Edi Rama dhe kabinetit qeveritar, ndërsa kundërshtojnë edhe klasën politike.
Edhe në protestën e sotme, pjesë e tubimit janë qytetarë të ardhur nga Diaspora. Shqiptarë nga vende të ndryshme të botës iu bashkuan edhe protestës së një dite më parë, duke marrë pjesë në marshimin përgjatë bulevardit “Dëshmorët e Kombit”.
Një prej protestuesve deklaroi se qëndresa do të vijojë deri në largimin e qeverisë.
“Ne nuk do të largohemi nga ky shesh pa u larguar kjo qeveri e korruptuar dhe kjo klasë e inkriminuar”, u shpreh ai.
Duke folur për 78 ditët e protestës, ai tha se qytetarët kanë dëshmuar qëndrueshmëri dhe janë bashkuar përtej bindjeve politike dhe krahinave.
“Është e jashtëzakonshme sesi për 78 ditë ky bulevard ka një energji të jashtëzakonshme. Kemi treguar se jemi bashkë mbi çdo ideologji politike dhe krahinë nga vijmë. Do të jemi bashkë sepse qëllimi është më i madh se ne, është vetë Shqipëria”, deklaroi protestuesi.
Ai pretendoi gjithashtu se ka pasur përpjekje për shpërndarjen e protestës dhe tha se qytetarët nuk do të tërhiqen.
“Njerëzit më të afërt të kryeministrit i kanë dhënë fjalën se do ta shpërndajnë protestën para shtatorit, por nuk do të shpërndahemi pa të larguar ty”, tha ai.
Protestuesi bëri thirrje që qëndresa të vijojë dhe që Shqipëria të vendoset mbi çdo interes politik.
“Ky bulevard është më i madh se secili prej nesh. Shqipërinë që nuk e bëri kjo klasë do ta bëjmë ne. Shqipëria i përket 99.9% të shqiptarëve që kanë ardhur në protestë, sepse kemi kuptuar misionin historik”, u shpreh ai.
Në përfundim, ai kërkoi që protesta të ruajë karakterin e saj jashtëpartiak dhe që në shesh të mos promovohen parti apo organizime politike.
“Mjafton që ai që vjen dhe flet të mos ketë funksione, të mos jetë këshilltar bashkiak dhe deputet. Nuk duhet të promovohen parti dhe organizime politike, sepse secili ka bindjet e tij. Nëse i artikulojmë, do të harrojmë qëllimin dhe do të merremi me njëri-tjetrin”, përfundoi protestuesi.
