Gjykata e Posaçme Kundër Korrupsionit dhe Krimit të Organizuar ka lënë në fuqi masën e sigurisë “arrest në burg” për biznesmenin Ergys Agasi.
Pas përfundimit të seancës, avokati i tij, Maks Haxhia, në një deklaratë për mediat jashtë ambienteve të Prokurorisë së Posaçme, dha detaje mbi qëndrimin e mbrojtjes dhe shpjegimet e dhëna nga biznesmeni.
Sa i përket akuzës për korrupsion pasiv, Haxhia tha se mbrojtja ka ngritur pretendime mbi provat e paraqitura deri tani nga organi i akuzës.
“Problemi është që akuza e heqjes së paligjshme të lirisë në drejtim të zotit Agasi, me analizat që iu bënë provave të administruara dhe vendimeve të prokurorisë, tregoi dhe çoi në çlirimin e kësaj akuze në ngarkim të zotit Agasi”, u shpreh avokati.
Haxhia tha se, sipas mbrojtjes, pasiguria mbi materialin e paraqitur për akuzën e korrupsionit pasiv ka qenë një nga çështjet e ngritura gjatë seancës.
“Akuzën për korrupsion pasiv, pasiguria e materialit të paraqitur deri tani e ka ndjekur akuzën për të qëndruar në pozitat e presionit ndaj gjykatës. Sot u paraqit kjo akuzë”, tha ai.
Avokati bëri me dije gjithashtu se gjatë seancës ka dhënë shpjegime edhe vetë Ergys Agasi, i cili ka mohuar përfshirjen në tendera apo përfitimin prej tyre.
“Klienti foli dhe dha shpjegime dhe insistoi e provoi se nuk ka qenë kurrë pjesëmarrës në tendera, nuk ka pasur asnjë përfitim nëpërmjet tenderimit dhe nuk ka qenë pjesë e grupeve kriminale në presione të ndryshme”, deklaroi Maks Haxhia.
Ergys Agasi ishte shpallur në kërkim që prej dhjetorit 2025 dhe u arrestua më 26 gusht 2026, në zonën e Plepave në Durrës.
Në momentin e arrestimit, biznesmeni ndodhej në një automjet së bashku me ish-punonjësin e Policisë së Shtetit, Uljan Shpataraku, i cili gjithashtu u vu në pranga.a.b
