Shqipëria dhe Mbretëria e Bashkuar kanë nënshkruar një marrëveshje për ndarjen e pasurive të rikuperuara nga një çështje penale e lidhur me trafikun e drogës. Marrëveshja konsiderohet e para e këtij lloji në rajon.
Marrëveshja mori shkas nga një çështje penale që lidhet me furnizimin me kanabis të grupeve të krimit të organizuar në Angli dhe Uells. Përmes bashkëpunimit mes autoriteteve britanike dhe shqiptare, pasuritë e përfituara nga aktiviteti kriminal u identifikuan dhe u rikuperuan në Shqipëri.
Sipas marrëveshjes, të ardhurat e rikuperuara do të ndahen në mënyrë të barabartë mes Shqipërisë dhe Mbretërisë së Bashkuar. Pasuritë e sekuestruara synohet që më tej të riinvestohen për qëllime me përfitim social në të dyja vendet.
Marrëveshja u miratua në një ceremoni zyrtare të zhvilluar në Tiranë më 13 korrik, ku morën pjesë Ambasadori britanik në Shqipëri, Nicholas Abbott, dhe kryeadministratorja e Agjencisë së Administrimit të Pasurive të Sekuestruara dhe të Konfiskuara, Risena Xhaja.
Procesi është rezultat i bashkëpunimit disa-mujor mes institucioneve britanike dhe shqiptare të zbatimit të ligjit dhe drejtësisë, me përfshirjen e Home Office, Agjencisë Kombëtare të Krimit (NCA), Shërbimit të Prokurorisë së Kurorës (CPS) dhe AAPSK-së.
Marrëveshja synon të përcjellë një mesazh të qartë ndaj grupeve kriminale se pasuritë e krijuara nga krimi do të ndiqen dhe rikuperohen edhe përtej kufijve, ndërsa bashkëpunimi mes dy vendeve do të vijojë për goditjen e financave të krimit të organizuar.m.k
