Ministri për Evropën dhe Punët e Jashtme, Ferit Hoxha, ka reaguar pas deklaratave të kryeministrit të Malit të Zi, Milojko Spajić, dhe raportimeve mediatike që kanë aluduar për përfshirjen e Shqipërisë në veprimtari hibride destabilizuese.
Hoxha i ka hedhur poshtë këto pretendime, duke theksuar se nuk ka asnjë akuzë zyrtare të formuluar ndaj Shqipërisë dhe se Tirana mbetet një faktor i rëndësishëm i stabilitetit në rajon.
Ministri i Jashtëm tha se raportimet mediatike duhen trajtuar me rezervën e nevojshme dhe se debatet apo interpretimet e brendshme politike në një vend fqinj nuk duhet të krijojnë artificialisht tensione mes dy vendeve.
“Edhe pse nuk ka asnjë akuzë të formuluar zyrtarisht ndaj Shqipërisë, dua të theksoj fort dhe qartë se Shqipëria as nuk është dhe as nuk mund të jetë pjesë e ndonjë skenari destabilizues, as në Malin e Zi, një vend fqinj, mik, partner dhe aleat në NATO, me të cilin ndajmë të njëjtin projekt të anëtarësimit në BE, dhe as askund tjetër”, deklaroi Hoxha.
Ai theksoi se Shqipëria, në të kundërt, po investon në mënyrë të vazhdueshme në bashkëpunim, mirëkuptim dhe zhvillim rajonal.
Hoxha bëri të ditur gjithashtu se Tirana dhe Podgorica vijojnë kontaktet në të gjitha nivelet diplomatike. Sipas tij, ai ka zhvilluar komunikime të drejtpërdrejta me zëvendëskryeministrin dhe ministrin e Jashtëm të Malit të Zi, Ervin Ibrahimović, si dhe me zëvendëskryeministrin Nik Gjeloshaj.
Në përfundim, ministri për Evropën dhe Punët e Jashtme iu drejtua edhe faktorëve politikë në Shqipëri, duke u kërkuar që të marrin informacionin e nevojshëm nga burimet zyrtare dhe të shmangin përdorimin e politikës së jashtme si pjesë të debateve të brendshme partiake.
Hoxha nënvizoi se politika e jashtme kërkon qetësi, maturi dhe përgjegjësi, veçanërisht kur bëhet fjalë për marrëdhëniet me vendet fqinje dhe partnerët e Shqipërisë.
