Këshilli Bashkiak i Poliçanit ka votuar unanimisht kundër propozimit për shkrirjen e bashkisë dhe bashkimin e saj me Bashkinë e Beratit, në kuadër të ndryshimeve të propozuara në ndarjen administrative-territoriale të vendit.
Në mbledhjen ku u diskutua projektligji, ishte i pranishëm edhe kryetari i Bashkisë Poliçan, Adriatik Zotkaj, i cili shprehu kundërshtimin e tij ndaj riorganizimit të propozuar. Sipas tij, shkrirja e Poliçanit nuk pasqyron vullnetin e komunitetit dhe nuk merr në konsideratë zhvillimin që ka njësia vendore.
Zotkaj argumentoi se Poliçani ka potencial për të vijuar funksionimin si bashki, duke evidentuar aktivitetin ekonomik dhe social të zonës. Ai bëri të ditur se aktualisht në bashki ushtrojnë aktivitet rreth 318 biznese, ndërsa zona ka potenciale në turizmin malor dhe atë industrial.
Kryebashkiaku veçoi gjithashtu projektet e ndërmarra për kategori të ndryshme të komunitetit, përfshirë të rinjtë dhe moshën e tretë, si tregues të nevojës për ruajtjen e strukturës së bashkisë.
Në përfundim të diskutimeve, të gjithë anëtarët e Këshillit Bashkiak të Poliçanit votuan kundër propozimit për shkrirjen e bashkisë dhe bashkimin e saj me Beratin.