Një robot humanoid i zhvilluar nga kompania kineze Honor ka arritur një rezultat spektakolar në testet e zhvilluara në Pekin, duke përshkuar distancën e 100 metrave për 9.32 sekonda.
Rezultati vjen 17 vite pasi sprinteri xhamajkan Usain Bolt vendosi rekordin botëror prej 9.58 sekondash në Kampionatin Botëror të Berlinit, në vitin 2009.
Roboti, i pagëzuar “Lightning” (Rrufeja), regjistroi një shpejtësi maksimale prej 14.5 metrash në sekondë gjatë provave të zhvilluara në kuadër të përgatitjeve për Kampionatin Botëror të Robotikës Humanoide në Pekin.
“Lightning” nuk është i panjohur në garat e vrapimit. Në muajin prill, roboti fitoi gjysmëmaratonën e Pekinit me kohën 50 minuta e 26 sekonda, duke tërhequr vëmendjen për performancën e tij.
Në atë fazë, humanoidi ishte 169 centimetra i gjatë dhe kishte këmbë 95 centimetra. Për testin e sprintit 100 metra, inxhinierët e Honor modifikuan strukturën e tij, duke i zgjatur këmbët me 10 centimetra.
Performanca e “Lightning” është një tjetër tregues i ritmit me të cilin po zhvillohet teknologjia e robotëve humanoidë, veçanërisht në fushën e lëvizjes dhe shpejtësisë.