Nga muaji shtator, kontrolli shëndetësor bazë falas zgjerohet për të gjithë qytetarët mbi 35 vjeç, pa një kufi të sipërm moshor. Zgjerimi i programit kombëtar të Kontrollit Mjekësor Bazë (Check-Up) synon t’i japë një numri më të madh qytetarësh mundësinë për të kontrolluar në mënyrë periodike gjendjen e tyre shëndetësore dhe për të identifikuar sa më herët faktorët e rrezikut apo problematikat që mund të kërkojnë ndjekje të mëtejshme.
Ministria e Shëndetësisë dhe Mirëqenies Sociale bën me dije se, duke nisur nga shtatori, çdo qytetar mbi moshën 35 vjeç do të mund të përfitojë falas nga programi i Kontrollit Mjekësor Bazë, duke e zgjeruar kështu mbulimin e këtij shërbimi brenda sistemit publik shëndetësor.
Për të kryer kontrollin, qytetarët duhet të kontaktojnë Qendrën Shëndetësore ku janë të regjistruar, ku do të marrin informacionin e nevojshëm lidhur me procedurat dhe mënyrën e ndjekjes së shërbimit.
Zgjerimi i Check-Up-it vjen në funksion të një koncepti gjithnjë e më të rëndësishëm në kujdesin shëndetësor: më mirë parandalimi sesa përballja me pasojat e një sëmundjeje të avancuar. Kontrollet periodike mundësojnë identifikimin e hershëm të disa faktorëve të rrezikut dhe problemeve shëndetësore, duke krijuar mundësi për këshillim, ndjekje dhe ndërhyrje në kohë, sipas nevojave individuale.
Në këtë kuptim, kontrolli shëndetësor nuk duhet parë vetëm si një procedurë rutinë, por si një mundësi për të qenë më i ndërgjegjshëm për gjendjen e organizmit dhe për të mos pritur shfaqjen e simptomave për t’iu drejtuar mjekut.
Zgjerimi pa kufizim të sipërm moshor e vendos parandalimin në dispozicion të një kategorie më të gjerë qytetarësh, veçanërisht të atyre që, me kalimin e moshës, mund të kenë nevojë për një vëmendje më të rregullt ndaj faktorëve të ndryshëm të rrezikut.
Programi i Kontrollit Mjekësor Bazë është një prej shërbimeve të ofruara falas në kuadër të sistemit publik shëndetësor dhe mbështetet pikërisht në filozofinë e kujdesit parandalues dhe ndjekjes periodike të gjendjes shëndetësore.
Zgjerimi i tij mund të shërbejë edhe si një nxitje për qytetarët që ta konsiderojnë kontrollin periodik pjesë të kulturës së kujdesit ndaj vetes dhe familjes. Sepse shëndeti nuk kërkon vëmendje vetëm atëherë kur shfaqet një shqetësim; ai kërkon kujdes edhe kur ndihemi mirë.
Në këtë perspektivë, një kontroll i kryer në kohë mund të jetë shumë më tepër se një analizë rutinë: mund të jetë një mundësi për të zbuluar një rrezik përpara se ai të kthehet në problem, për të marrë një këshillë përpara se të jetë vonë dhe për të vendosur kujdesin shëndetësor aty ku duhet të jetë gjithmonë – te parandalimi.
Nga shtatori, për qytetarët mbi 35 vjeç, kjo mundësi zgjerohet pa kufizim të sipërm moshor.
Një kontroll falas, një mundësi më shumë për të njohur gjendjen e shëndetit dhe për të vepruar në kohë.
A.Vataj/ KJ