Ndryshime të reja janë bërë në strukturat drejtuese të Policisë së Shtetit, me disa lëvizje në drejtori qarku dhe në strukturat e Drejtorisë së Përgjithshme.
Fatmir Hoxha, i emëruar drejtor i Policisë së Elbasanit në nëntor 2024, pas përzgjedhjes përmes garës për drejtuesit e rinj, nuk do të jetë më në krye të këtij qarku. Pas rreth dy vitesh në detyrë, Hoxha do të largohet nga drejtimi i Policisë së Elbasanit dhe, sipas ndryshimeve të firmosura nga drejtori i Përgjithshëm i Policisë, do të emërohet specialist në Drejtorinë për Integrimin, pranë Drejtorisë së Përgjithshme.
Në vend të tij në Elbasan pritet të vendoset Kastriot Skënderaj, një emër me eksperiencë në strukturat e Policisë së Shtetit. Skënderaj ka drejtuar më herët Policinë e Tiranës dhe atë të Beratit, ndërsa së fundmi ka mbajtur detyrën e këshilltarit të drejtorit të Përgjithshëm të Policisë.
Lëvizje ka edhe për Luigj Vathin, i cili nuk do të vijojë më si drejtues i Policisë së Beratit. Vathi, ish-zëvendësdrejtor i Policisë së Tiranës, është emëruar në krye të Policisë Kufitare dhe Migracionit në Korçë.
Pozicioni i drejtorit të Policisë së Beratit mbetet për momentin vakant, ndërsa janë diskutuar disa emra me karrierë në polici, pa u marrë ende një vendim përfundimtar.
Ndërkohë, Gëzim Zhupaj, i cili deri tani drejtonte strukturat e Kufirit dhe Migracionit në Korçë, është emëruar shef sektori në Departamentin për Kufirin dhe Migracionin, pranë Drejtorisë së Përgjithshme të Policisë.
Një tjetër ndryshim prek strukturat e Policisë së Tiranës. Dashnor Muhaj, zëvendësdrejtor i Tiranës për Rendin dhe Sigurinë, do të largohet nga kjo detyrë dhe do të emërohet specialist për migracionin e parregullt në Departamentin për Kufirin dhe Migracionin, në Drejtorinë e Përgjithshme.
Muhaj ka qenë një prej drejtuesve të angazhuar në menaxhimin e protestave të muajve të fundit në Tiranë.
Edhe pozicioni i zëvendësdrejtorit të Tiranës për Rendin dhe Sigurinë mbetet aktualisht vakant, ndërsa pritet që në vijim të caktohet personi që do të marrë këtë detyrë.
