Kryeministri Edi Rama ka njoftuar vendimin për shpronësimin për interes publik të të gjithë zonës ku një ditë më parë ndodhi konflikti mes dy biznesmenëve , Vasil Bedinaj dhe Luan Muça duke deklaruar se hapësira do të kthehet në një aset publik dhe turistik.
Rama tha se konflikti, të cilin e cilësoi si “banal dhe brutal”, së bashku me analizën e hartës pronësore të zonës, ka bindur qeverinë se duhet t’i jepet fund kësaj historie dhe të përcillet një mesazh i qartë për të gjithë ata që zhvillojnë apo menaxhojnë asete turistike.
Sipas kryeministrit, sjellja e aktorëve të turizmit duhet të jetë në përputhje me atë që ai e cilësoi si mision kombëtar për Shqipërinë turistike.
“Ne kemi vendosur ta shpronësojmë, ta shpronësojmë për interes publik të gjithë zonën e atij konflikti banal dhe brutal të ditës së djeshme dhe, sipas ligjit, ta kthejmë në një aset publik dhe turistik për të gjithë”, tha Rama.
Ai bëri të ditur se në këtë hapësirë synohet të krijohet një park i dedikuar ullirit, ku do të ruhen dhe mbillen varietete autoktone shqiptare dhe varietete përfaqësuese të Mesdheut.
Në fakt shpronësimi mund të jetë perde për probleme ligjore që lidhen me përfitimin e pronës ku mund të jenë konsumuar edhe vepra penale.
Në zonë, sipas Ramës, do të ekspozohen edhe vajrat e ullirit që prodhohen në Shqipëri, ndërsa hapësira do të shërbejë si një adresë e re informimi dhe një pikë për turizmin e eksperiencës.
Kryeministri paralajmëroi gjithashtu masa ndaj sjelljeve që, sipas tij, dëmtojnë imazhin e turizmit shqiptar.
“Ata duhet të kuptojnë që nuk mund ta cënojnë me qasjet dhe me sjelljet e tyre lënduese atë që është një mision i madh kombëtar, misioni ynë i Shqipërisë turistike, i cili shkon shumë përtej transformimit fizik të vendit”, u shpreh Rama.
Ai tha se çdo formë dhune, arrogance, papërgjegjshmërie ndaj hapësirës publike apo sjelljeje shqetësuese ndaj klientëve dhe komunitetit duhet të marrë përgjigjen e nevojshme.
Sipas tij, toka që “i ndau me dhunë dy investitorë fqinj” do të shndërrohet në një hapësirë publike që bashkon njerëzit dhe promovon paqen, nën simbolikën e ullirit, të cilin Rama e cilësoi si “pemën e paqes” dhe “pemën e bekuar të ullirit”. a.b
:::
