Lajm i keq për Juventusin dhe trajnerin Luciano Spalletti. Kenan Yildiz pritet t’i nënshtrohet një ndërhyrjeje kirurgjikale në këmbën e majtë, pas dëmtimit të pësuar në ndeshjen ndaj Frosinones.
Sulmuesi turk pësoi një goditje në këmbë gjatë debutimit të Juventusit në kampionat, në transfertën ndaj Frosinones. Fillimisht dëmtimi nuk dukej veçanërisht shqetësues, por ekzaminimet e mëvonshme ngritën dyshime për një frakturë të metatarsit të pestë të këmbës së majtë.
Pas konsultave mjekësore të zhvilluara gjatë orëve të fundit, Yildiz dhe klubi bardhezi kanë vendosur për operacionin. Tashmë mbetet për t’u përcaktuar vetëm se ku dhe kur do të kryhet ndërhyrja. Sipas vlerësimeve të para, Yildiz mund të qëndrojë jashtë fushave për rreth tre muaj, një mungesë që do të ishte një goditje e fortë për planet e Spallettit.
Nëse rikuperimi zgjat rreth 8-10 javë, sulmuesi turk mund të humbasë rreth dhjetë ndeshje të kampionatit italian. Në listën e sfidave që mund të mos luajë përfshihen përballjet me Parman, Milanin, Sassuolon, Atalantën, Cagliarin, Lazion, Leccen, Genoan, Napolin dhe Fiorentinën.
Mungesa e Yildiz do të ndihet edhe në Europë. Juventusit i duhet të bëjë llogaritë edhe me ndeshjet e Europa League, teksa shorti për kompeticionin është planifikuar të hidhet të premten. Në repartin ofensiv, Spalletti ka aktualisht në dispozicion Alajbegovic dhe Boga, të cilët mund të përdoren në rolin që zakonisht mbulohet nga Yildiz.
Për shkak të kohës së gjatë të rikuperimit, Juventusit mund t’i duhet të marrë një vendim edhe për listën UEFA. Klubi mund të zgjedhë të mos e përfshijë Yildiz në fazën e parë të Europa League dhe të përdorë një tjetër lojtar në vend të tij, sidomos nëse merkatoja sjell një përforcim të ri.