E ardhmja e Julian Alvarez rikthehet në qendër të merkatos, me Barcelonën që nuk ka hequr dorë nga sulmuesi i Atletico Madridit. Presidenti i klubit katalanas, Joan Laporta, konfirmoi interesin për argjentinasin dhe bëri të qartë se oferta e “Blaugranave” mbetet aktive.
“Jemi shumë të interesuar për lojtarin dhe do të dëshironim që oferta jonë të pranohej. E bëjmë këtë me respekt maksimal për Atletico Madridin. Nëse janë të gatshëm ta shesin këtë verë, ne jemi gati ta blejmë sipas kushteve të propozuara”, deklaroi Laporta.
Presidenti i Barcelonës shpjegoi gjithashtu se kishte komunikuar drejtpërdrejt me drejtuesin e Atletico Madridit, Miguel Angel Gil Marín, pasi klubi katalanas kishte paraqitur ofertën zyrtare. Përgjigjja e parë e madrilenëve ishte negative, pasi nuk dëshironin të shisnin Alvarez pa gjetur më parë një zëvendësues.
Megjithatë, situata mund të ketë ndryshuar. Laporta tha se Barcelona ka marrë informacione se Atletico po negocion me klube të tjera për sulmuesin dhe për këtë arsye oferta katalanase vazhdon të jetë në tavolinë.
Ndërkohë, Alvarez ka shprehur dëshirën për t’u larguar dhe Barcelona mbetet destinacioni i tij i preferuar, me Arsenalin si alternativë të mundshme. Atletico, nga ana tjetër, këmbëngul se dëshiron ta mbajë argjentinasin.