Dinamo City luan sot një nga ndeshjet më të rëndësishme të sezonit, teksa në orën 19:00 përballet me Pafos në “Limassol Stadium”, në sfidën e kthimit të play-off-it të UEFA Conference League.
Pas barazimit 1-1 në “Elbasan Arena”, gjithçka mbetet e hapur për kualifikimin në fazën e ligës së kompeticionit. Blutë kaluan të parët në avantazh në minutën e 79-të me Fadairon, por vetëm tre minuta më vonë skuadra qipriote fitoi një penallti, të cilën Lele e shndërroi në gol duke vendosur rezultatin përfundimtar.
Tashmë, fati i përballjes do të vendoset në Qipro, ku Dinamo City do të kërkojë të bëjë hapin e fundit drejt kualifikimit. Skuadra shqiptare udhëton me besimin se mund të marrë rezultatin e nevojshëm për të vijuar aventurën europiane.
Përballë do të jetë një Pafos që ka treguar se mund të jetë kundërshtar i vështirë, sidomos në shtëpi. Megjithatë, barazimi i ndeshjes së parë i jep Dinamos mundësinë për të luajtur shanset e saj deri në fund. 90 minuta që vlejnë shumë për të shkruar historinë me në krye një “specialist” si trajneri Ilir Daja.
