Nënkryetari i PD-së, Belind Këlliçi, ka reaguar pas arrestimit të Ergys Agasit, një prej personave të shpallur në kërkim në kuadër të dosjes së SPAK për AKSHI-n. Këlliçi ngre pikëpyetje mbi rrethanat e arrestimit të Agasit, duke e lidhur atë me zhvillimet brenda kupolës së pushtetit. ”Cilat raporte në kupolën e Organizatës janë prishur, që u arrestua sot Gysi i Ramës?”, shkruan Këlliçi. Sipas tij, edhe pse Agasi ndodhej prej muajsh në kërkim policor, ai vijonte rutinën e tij të përditshme. Këlliçi pretendon se Agasi u arrestua teksa udhëtonte me automjet nga Elbasani drejt Durrësit dhe ishte në shoqërinë e një ish-efektivi të Policisë së Shtetit.
Postimi i plotë
Cilat raporte në kupolën e Organizatës janë prishur, që u arrestua sot Gysi i Ramës?! Ergys Agasi edhe pse në kërkim policor prej muajsh, ishte në rutinën e tij duke udhëtuar me makinë nga Elbasani në Durrës, nën shoqërinë e një ish drejtuesi të lartë të policisë së shtetit, kur u arrestua pak më parë.
Sërish u konfirmua denoncimi i Partisë Demokratike se koordinatori i Edi Ramës për krimin dhe një prej njerëzve më të afërt të Kryeministrit, kishte mbrojtje shtetërore dhe nuk ndalohej nga policia, edhe pse dihej shumë mirë se ku shkonte, ku fshihej e ku qëndronte. Po çfarë ka ndryshuar në raportet dhe përplasjet e pushtetit, brenda kupolës së Organizatës Kriminale ‘Rilindja’, që sot u vendos të ndërpritej rehatia e Agasit, dhe t’i vendoseshin prangat?!
Është e thjeshtë dhe e logjikshme teza që kjo të jetë një lëvizje emergjente e Ballukut, nën urdhërat e të cilës është kryepolici Skënder Hita, i njohur gjerësisht dhe si Skënder Balluku, si shenjë presioni ndaj Edi Ramës! Në shtator priten ndryshime në qeveri, nën trysninë që ka krijuar protesta e 88 ditëve, dhe të besuarit e Ballukut që janë gjysma e qeverisë, janë më të rrezikuarit!
Informacione ka se edhe kërkesa e dytë e SPAK për imunitetin e Ballukut, është tashmë drejt zyrtarizimit! Me lëvizjen sot dhe goditjen e Agasit, ish zëvendëskryeministrja i dërgon mesazh të qartë shefit të Organizatës se çfarë është në gjendje të bëjë. Duke i thënë t’i mbajë larg duart nga qeveria, që praktikisht ajo e ka nën kontroll të plotë! Sot i’a arrestoi Gysin, në makinë me Shpatarakun! Nesër, mbase i arreston Olsin, në ndonjë zyrë kadastre, apo ambjent kazinoje.