Kryeministri Edi Rama ka pritur në Kryeministri boksierin shqiptar Nelson Hysa, i cili vetëm dy ditë më parë mbrojti me sukses titullin e tij, duke vijuar serinë e fitoreve pa asnjë humbje në karrierë. Hysa triumfoi ndaj norvegjezit Thomas Narmo, duke e mbyllur duelin brenda dy raundeve. Me këtë sukses, boksieri shqiptar e ka çuar rekordin e tij në 25 fitore dhe asnjë humbje.
Gjatë takimit në zyrën e Kryeministrit, Hysa i dhuroi Ramës dorezat e boksit, ndërsa ky i fundit e cilësoi kampionin shqiptar si “Albanian Eagle”. Boksieri tregoi edhe për vështirësitë e sfidës së fundit, duke theksuar se kishte rreth 11 muaj pa zhvilluar një ndeshje dhe se përballë kishte një kundërshtar fizikisht më të avantazhuar.
“Duhej të mbroja titullin dhe kundërshtari ishte shumë i fortë. Ishte norvegjez, shtatë centimetra më i gjatë dhe më i rëndë. Në fakt, ishte favorit. E humba raundin e parë, por në të dytin gjithçka shkoi shumë mirë”, u shpreh Hysa gjatë bisedës me Ramën. Kampioni shqiptar foli gjithashtu për pozicionimin e tij në renditjet botërore, duke deklaruar se është aktualisht mes katër më të mirëve në kategorinë e tij.
Takimi nuk mungoi as batutat. Rama iu drejtua trajnerit të Hysës, Zef Gjonit, me një koment me nota humori: “Këtë hundën time ma keni thyer ju demokratët”. Me rekordin perfekt 25-0, Nelson Hysa vijon të shkruajë një nga historitë më të suksesshme të boksit shqiptar, ndërsa mbrojtja e fundit e titullit i ka dhënë një tjetër shtysë karrierës së tij ndërkombëtare.
