Luka Modric, i cili do të mbushë 41 vjeç më 9 shtator, ka folur hapur në një intervistë për të përditshmen spanjolle “Marca” rreth ndjenjave të tij aktuale. Ai pranon se i mungon Madridi, qyteti, Real Madridi dhe gjithçka tjetër, por thekson se ndihet mirë dhe i lumtur në Milano. Futbollisti kroat i Milanit shprehet i kënaqur me pritjen e ngrohtë që i është bërë që nga dita e parë, duke e konsideruar qëndrimin e tij për të dytin vit radhazi si dëshmi të kësaj lumturie. Edhe pse malli për Madridin është i madh, ai është i lumtur edhe në realitetin e tij të tanishëm në Milano.
Modric rrëfen se largimi nga Madridi dhe Real Madridi ishte më i vështirë sesa përshtatja me realitetin e ri. Ai shpjegon se duhet të pranosh që një ditë gjithçka merr fund dhe të shkëputesh nga eksperiencat e jetuara intensivisht. Për të, ishte më e vështirë të thoshte lamtumirë sesa të mbërrinte në Milano dhe gradualisht të mësohej me një përditshmëri, realitet dhe klub të ri. Megjithatë, ai thekson se u largua me kokën lart, i sigurt se kishte dhënë gjithçka që kishte në mundësitë e tij për klubin mbretëror.
Mesfushori kroat përshkruan Milanin si një nga klubet më të mira dhe historike në botë, të ngjashëm me Real Madridin. Ai pranon se ndoshta në vitet e fundit klubi nuk ka arritur rezultatet e zakonshme, por kjo nuk ndryshon faktin që mbetet një klub i madh dhe ndër më të dashurit globalisht. Modric tregon se e ndjen historinë e Milanit kudo, madje edhe në qendrën stërvitore, duke përmendur legjendat dhe lojtarët e mëdhenj që kanë luajtur aty. Kjo ishte një nga arsyet kryesore pse zgjodhi Milanin, pasi si fëmijë, kur ndiqte futbollin italian, Milani ishte skuadra e tij e preferuar. Kështu, pas largimit nga Real Madridi, vendimi për t’u bashkuar me kuqezinjtë ishte i lehtë, për shkak të dashurisë dhe respektit të madh që ka pasur gjithmonë për klubin.
Duke folur për objektivat e sezonit të sapofilluar, Modric shprehet se dëshiron të bëjë më mirë se vitin e kaluar. Ai kujton se për një kohë të gjatë Milani performoi shumë mirë, duke luftuar për titullin deri në mars, por më pas në ndeshjet e fundit “hodhi poshtë” gjithçka dhe nuk arriti të kualifikohej për Champions League. Kjo ishte një goditje e rëndë, pasi Milani, për shkak të historisë së tij si klubi i dytë me më shumë tituj pas Real Madridit, duhet të luajë në Champions League çdo vit. Objektivat e tij janë të performojë mirë, të ndihmojë ekipin në çdo aspekt, brenda dhe jashtë fushës. Ai vëren entuziazmin e madh dhe ndryshimet e shumta në skuadër, përfshirë trajnerin e ri dhe lojtarët e rinj, duke theksuar se klubi e konsideron atë një pjesë të rëndësishme të projektit. Modric dëshiron të garojë, të japë gjithçka dhe të ndihmojë Milanin të kthehet te fitoret, duke theksuar se kjo mund të arrihet vetëm me përpjekje kolektive.
Motivimi i tij mbetet i lartë, pasi futbolli është jeta e tij që në moshën gjashtë vjeçare. Ai vazhdon të argëtohet, të ketë të njëjtën ambicie, motivim dhe pasion. Ndjenjat pozitive e bëjnë më të lehtë vazhdimin, dhe falë Zotit, ai ndihet mirë fizikisht dhe mendërisht. Modric nuk e konsideron futbollin një punë, por diçka me të cilën argëtohet dhe kënaqet. Ai nuk ka ditë kur mendon të heqë dorë apo të mos stërvitet. Për sa kohë që ndihet kështu, nuk sheh arsye për t’u ndalur. Ai është i vetëdijshëm për bisedat rreth moshës, por kjo nuk e kushtëzon. Modric jeton ditë pas dite dhe beson se trupi i tij do t’i tregojë kur të vijë momenti për t’u tërhequr. Ai ka qenë gjithmonë realist dhe i sinqertë me veten, duke pranuar se fundi është afër, por do të shohë sa kohë do të vazhdojë të luajë.
Në kohën e tij të lirë në Milano, Modric është një person normal, një familjar. Ai përpiqet të kalojë kohë me familjen dhe fëmijët e tij, duke bërë gjëra të zakonshme. I pëlqen të luajë padel, tenis dhe basketboll sa herë që ka mundësi. Për sa i përket të ardhmes, ai nuk e fsheh dëshirën për t’u kthyer një ditë në Madrid, të cilin e konsideron shtëpinë e tij. Megjithatë, ai dëshiron të kthehet vetëm nëse mund të jetë i dobishëm dhe të ndihmojë Real Madridin, jo thjesht për të qenë atje pa një qëllim. Kjo është mentaliteti i tij: të punojë “për Real Madridin”, siç ka thënë Mourinho, për ta bërë klubin gjithnjë e më të madh. Vetëm në këtë mënyrë do të dëshironte të kthehej.
Marrë nga La Gazzetta dello Sport