Zjarri që përfshiu mbrëmjen e së premtes kodrat e Himarës ishte i përmasave të mëdha, duke alarmuar banorët dhe turistët që ndodhen në zonë. Flakët krijuan momente paniku, ndërsa disa turistë tregojnë se e patën të vështirë të largoheshin për shkak të bllokimit të rrugëve.
“Dje ishte vërtet shumë e frikshme. Në një moment mendova: ‘Si do të largohemi nga këtu?’. Taksitë na thanë se rrugët ishin të bllokuara dhe nuk mund të vinin. Sot ndihem më e sigurt, pasi situata duket më e mirë”, tregojnë turistet.
Një tjetër turist thotë se personat me përvojë nga Australia i këshilluan të largoheshin nga zona, ndërsa shprehet i trishtuar për dëmet që zjarri shkakton në natyrë.
Autoritetet bëjnë me dije se situata është përmirësuar, por rreziku ende nuk ka kaluar. Qytetarëve u është kërkuar të ndjekin udhëzimet e ekipeve të ndërhyrjes. Ndërkohë, një çoban është shoqëruar në Komisariatin e Vlorës, pasi dyshohet se ka shkaktuar zjarre përgjatë ByPass-it të qytetit. Hetimet vijojnë.