Prokuroritë e Elbasanit dhe Beratit kanë kërkuar zhbllokimin e menjëhershëm të pagave të muajit gusht për prokurorët, oficerët e policisë gjyqësore dhe punonjësit e administratës, pasi urdhërpagesat e tyre nuk janë ekzekutuar. Në një shkresë të datës 3 shtator, Prokuroria e Elbasanit bën me dije se bankat e nivelit të dytë kanë marrë urdhër nga Dega e Thesarit për kthimin e fondeve të çelura nga Banka e Shqipërisë.
Sipas Prokurorisë, fondet për pagat kanë qenë të parashikuara dhe të disponueshme në buxhet, ndërsa urdhërpagesat ishin përpunuar. Megjithatë, kalimi i pagave është penguar, pa u komunikuar një akt i arsyetuar apo një bazë ligjore konkrete për këtë vendim. Prokuroritë kërkojnë që situata të zgjidhet sa më shpejt dhe pagat e punonjësve të ekzekutohen, duke ngritur shqetësime mbi arsyet dhe bazën ligjore të bllokimit të fondeve.
“Administrimi i thesarit duhet t’i shërbejë realizimit të detyrimeve kushtetuese dhe ligjore, jo pezullimit të tyre. Një mosmarrëveshje e tillë nuk mund të shërbejë si shkak për kthimin e fondeve të disponueshme dhe bllokimin e pagave korrente, të cilat përbëjnë detyrime të menjëhershme të institucionit ndaj punonjësve dhe magjistratëve”, thotë prokuroria e Elbasanit.
Prokuroritë kërkojnë zhbllokimin e pagave dhe informacion të plotë mbi bazën ligjore, aktin administrativ dhe autoritetin që ka urdhëruar kthimin e fondeve në përpjekje për të arritur tek personat përgjegjës që kanë urdhëruar dhe zbatuar bllokimin e pagave: “Të identifikojë dhe të na bëjë me dije, me shkrim dhe pa vonesë, çdo akt, urdhër, udhëzim, instruksion, email, komunikim elektronik apo veprim tjetër administrativ që ka sjellë ose ka ndikuar në mosrealizimin, pezullimin, kthimin apo mos procedimin e pagesave të këtij institucioni”, thotë Prokuroria e Beratit.
Konflikti mes magjistratëve dhe qeverisjes qendrore nisi pasi Kuvendi i Shqipërisë injoroi një vendim të Gjykatës Kushtetuese që deri me 31 korrik të realizohej formula e re e pagave të tyre. Kur data kaloi, KLGJ dhe KLP thanë se janë të detyruara për ta zbatuar vetë vendimin e Kushtetueses ndërsa vendosën pagën referuese. Zhbllokimin e llogarive e kanë kërkuar njëkohësisht veç KLGJ DHE KLP edhe Shoqatat e Gjyqtarëve e të Prokurorëve dhe Gjykata e Lartë.