Një skemë që synon të tërheqë artistët dhe profesionistët më të talentuar në Britaninë e Madhe po përdoret si instrument mashtrimi, zbulon një hetim i BBC-së. Vepra që nuk janë krijuar nga aplikantët, ekspozita të organizuara artificialisht, artikuj të rremë në media dhe rekomandime të sajuara përdoren për të ndërtuar një identitet artistik të rremë me qëllim sigurimin e vizës britanike. Hetimi tregon se pas fasadës së talentit mund të fshihet një industri falsifikimi, ku reputacioni artistik shitet për mijëra, madje qindra mijëra paund.
Kompani konsulence në Mbretërinë e Bashkuar dyshohet se po ndihmojnë emigrantë të paraqiten në mënyrë të rreme si artistë të talentuar dhe ekspertë të teknologjisë për të përfituar viza përmes skemës së përshpejtuar të emigracionit Global Talent. Përfituesit e kësaj vize nuk intervistohen, por duhet të dëshmojnë se kanë talent të jashtëzakonshëm ose potencial të lartë; viza u mundëson gjithashtu të marrin me vete familjarët dhe të aplikojnë për qëndrim të përhershëm pas tre ose pesë vitesh.
Gjatë hetimit, një gazetar i BBC-së, i paraqitur si klient i mundshëm, kontaktoi një kompani konsulence në Londër. Një përfaqësues i saj i ofroi një paketë shërbimesh që përfshinte vepra arti të prodhuara në Kinë, organizim ekspozitash, publikime në media dhe letra rekomandimi. Konsulentët thanë se klientët që zgjidhnin paketën e plotë, me vlerë mbi 100 mijë paund, nuk kishin pasur asnjëherë aplikim të refuzuar për vizën Global Talent.
Hetimi i BBC-së ka çuar në rishqyrtimin e dy rasteve konkrete. Home Office ka nisur procedurat për revokimin e vizave të dy shtetasve nigerianë që kishin aplikuar duke u paraqitur si fotografë të arteve të bukura, pasi u zbuluan artikuj në internet që lavdëronin punën e tyre dhe dyshohet se ishin të falsifikuar. Ministria e Brendshme e ka cilësuar zbulimin si “jashtëzakonisht serioz” dhe konfirmon se kompania që ofroi paketën mbi 100 mijë paund është nën hetim.
Hetimi ngre pyetje mbi mënyrën se si verifikohen kualifikimet dhe arritjet profesionale të aplikantëve në skemën Global Talent. Ministria thotë se skema është në proces rishikimi dhe se ministrja e Brendshme do të marrë çdo masë të nevojshme për të parandaluar abuzimin me të.