Kaos në qiellin amerikan, mbi 11 mijë fluturime të anuluara pas defektit masiv në sistemin e kontrollit ajror
Shtetet e Bashkuara po përballen me një krizë të rëndë në transportin ajror, pas një defekti masiv në sistemet e kontrollit të trafikut ajror, që detyroi autoritetet të ndalonin për më shumë se katër orë të gjitha ngritjet e avionëve. Mijëra pasagjerë mbetën të bllokuar në aeroporte, ndërsa qindra avionë dolën jashtë itinerareve të planifikuara.
Sipas të dhënave të platformës FlightAware, më shumë se 8,860 fluturime u anuluan të premten, ndërsa rreth 2,650 të tjera rezultonin të anuluara edhe të shtunën, duke e çuar numrin në mbi 11,500. Edhe pse hapësira ajrore amerikane është rihapur, kompanitë paralajmërojnë se rikthimi në normalitet mund të zgjasë disa ditë.
Problemet u shfaqën pas një paqëndrueshmërie në sistemet e komunikimit dhe të të dhënave të radarëve, të përdorura nga qendrat e kontrollit ajror. Administrata Federale e Aviacionit (FAA) urdhëroi ndalimin e ngritjeve për arsye sigurie. Ndërkohë, fluturimet që ndodheshin në ajër vijuan drejt destinacioneve të sigurta. Në disa aeroporte, pasagjerët u detyruan të qëndronin për orë të tëra në avionë, ndërsa të tjerë humbën lidhjet me fluturimet e radhës.
Autoritetet amerikane kanë bërë të ditur se defekti lidhet me mbingarkesën e pajisjeve të vjetra të telekomunikacionit, të cilat përdorin teknologji të dekadave të mëparshme. Ministri i Transportit, Sean Duffy, pranoi se infrastruktura e kontrollit ajror ka nevojë për një modernizim të plotë. Deri më tani nuk ka prova për një sulm kibernetik, ndërsa hetimet për shkakun fillestar të defektit vijojnë.
Kriza ka zbuluar dobësitë e një prej rrjeteve më të mëdha të transportit ajror në botë. Problemet nuk lidhen vetëm me anulimin e fluturimeve, por edhe me çrregullimin e zinxhirit të udhëtimeve, pasi avionët dhe ekuipazhet nuk ndodhen më në pozicionet e planifikuara. Kompanitë Delta, United dhe American Airlines kanë nisur rikthimin gradual të shërbimeve, por paralajmërojnë vështirësi në ditët në vijim.
Ndërkohë, qeveria amerikane po shqyrton një investim prej rreth 50 miliardë dollarësh për modernizimin e sistemeve të kontrollit ajror, përfshirë zëvendësimin e pajisjeve të vjetra dhe instalimin e rrjeteve të reja dixhitale. Kongresi ka miratuar më herët 12.5 miliardë dollarë për këtë proces, ndërsa administrata kërkon financime shtesë.
Ngjarja konsiderohet ndër ndërprerjet më të rënda të trafikut ajror amerikan që prej sulmeve terroriste të 11 shtatorit 2001. Përtej kaosit të krijuar për mijëra udhëtarë, defekti ka rikthyer në qendër të debatit sigurinë dhe besueshmërinë e infrastrukturës ajrore amerikane, si dhe nevojën urgjente për modernizimin e saj.
/vizionplus.tv
