Parashikimi misterioz që ndikoi në jetën e Princeshë Dianës, po kërkonte një vend që niste me shkronjën “A” për një jetë të re me kirurgun pakistanez

Në përpjekje për të gjetur vendin ku mund të ndërtonin të ardhmen e tyre, ajo kishte udhëtuar drejt Australisë dhe Afrikës së Jugut, e ndikuar edhe nga parashikimi i një mediumeje, e cila i kishte thënë se do të vendosej në një shtet që fillonte me shkronjën “A”.

Historia është risjellë në vëmendje nga gazetari Richard Kay, i cili zbulon prapaskenat e udhëtimeve të Dianës në vitet e fundit të jetës së saj dhe dëshirën e saj për të krijuar një familje me Hasnat Khan.

Pas divorcit nga atëherë Princi Charles, Diana ishte dashuruar marrëzisht me Hasnat Khan, një kirurg kardiak me origjinë pakistaneze, të cilin e kishte njohur në spitalin Royal Brompton në Londër, ku ai po trajtonte një mikeshë të saj.

Marrëdhënia mes tyre ishte bërë gjithnjë e më serioze dhe princesha kishte filluar të imagjinonte edhe martesën. Megjithatë, e ardhmja e tyre dukej e vështirë. Diana shqetësohej se statusi i saj mbretëror dhe fama ndërkombëtare mund të pengonin karrierën e Khanit, ndërsa ai kishte frikë se vëmendja mediatike do të ndikonte në ambiciet e tij si mjek.

Në këtë periudhë, Diana konsultohej shpesh me mediume, astrologë dhe persona që pretendonin se mund ta ndihmonin të merrte vendime për jetën personale. Një prej tyre ishte Rita Rogers, një grua me origjinë rome nga Derbyshire, e cila, sipas Richard Kay, ishte kthyer në një prej personave të cilëve princesha u besonte më shumë.

Gjatë një bisede telefonike, Diana i kishte rrëfyer shqetësimet për marrëdhënien me kirurgun. Rogers i kishte thënë se ajo e shihte çiftin me një të ardhme së bashku, por vetëm në një vend të huaj. Sipas rrëfimit të gazetarit, Diana i kishte treguar se parashikimi përcaktonte një shtet që fillonte me shkronjën “A”.

Fillimisht, princesha kishte menduar për Amerikën, pasi prej kohësh besonte se mund të gjente atje një jetë më të qetë. Por më pas kishte shqyrtuar edhe mundësinë e Australisë.

Në nëntor të vitit 1996, Diana udhëtoi drejt Sidneit, në vizitën e saj të parë zyrtare jashtë vendit pas përfundimit të divorcit nga Charles. Një prej arsyeve që e shtynë drejt Australisë ishte fakti se Hasnat Khan kishte kaluar atje një pjesë të rëndësishme të formimit të tij profesional dhe i kishte treguar se kishte kujtime shumë të bukura nga ai vend.

Diana vizitoi edhe repartin e kardiologjisë ku ai kishte kryer një pjesë të trajnimit të tij mjekësor. Megjithatë, Australia nuk rezultoi një alternativë e mundshme për të. Distanca e madhe nga djemtë e saj, William dhe Harry, ishte një pengesë e pakapërcyeshme.

“Unë nuk mund të jetoja kurrë në anën tjetër të botës pa djemtë”, kishte thënë ajo.

Kështu, mbetej një tjetër mundësi: Afrika, dhe më konkretisht Afrika e Jugut. Atje jetonte vëllai i saj, Charles Spencer, por vendi kishte edhe një tjetër lidhje të rëndësishme me historinë e saj. Bëhej fjalë për kirurgun e njohur të transplantit të zemrës, Dr. Christiaan Barnard.

Diana kishte krijuar kontakte me të pas një takimi në një aktivitet bamirësie në Rimini të Italisë. Ajo e kishte pyetur nëse mund të kishte mundësi punësimi për Hasnat Khan në sistemin shëndetësor të Afrikës së Jugut dhe mjeku i kishte premtuar se do ta ndihmonte.

Për më tepër, transplanti i parë i suksesshëm i zemrës nga Dr. Barnard ishte kryer në spitalin Groote Schuur, në Cape Town, jo shumë larg banesës së vëllait të Dianës.

Në vitin 1997, Diana udhëtoi drejt Cape Town, ku qëndroi për tri net në shtëpinë e vëllait të saj, Charles Spencer, i cili jetonte në Afrikën e Jugut me katër fëmijët e tij. Sipas Spencer, ato ditë mbetën ndër kujtimet më të çmuara me të motrën.

“Dukej sikur ishim transportuar pas në fëmijërinë tonë, kur kalonim një pjesë kaq të madhe të kohës së bashku – dy më të vegjlit e familjes”, kishte kujtuar ai.

Gjatë vizitës, Diana pati mundësinë të kalonte kohë me mbesat dhe nipin, të vizitonte plazhet dhe zonat e vreshtave, si dhe të shihte mundësi për të blerë një shtëpi.

Ajo u takua gjithashtu me presidentin e atëhershëm të Afrikës së Jugut, Nelson Mandela. Gjatë takimit diskutuan për planet kundër përhapjes së AIDS-it në Afrikën Subsahariane.

Ndërkohë, Dr. Barnard po përpiqej të gjente mundësi profesionale për Hasnat Khan dhe kishte lënë mesazhe në shtëpinë e Spencerit për Dianën. Megjithatë, qëndrimi në Afrikën e Jugut nuk arriti ta bindte princeshën se ky ishte vendi ku mund të ndërtonte të ardhmen e saj.

Një ditë pas largimit të saj, fotografët kishin rrethuar banesën e vëllait. Diana i telefonoi Richard Kay dhe i tha:

“Jemi nën rrethim. Fjalë për fjalë, ka tetë makina plot me fotografë jashtë shtëpisë!”.

Pas kthimit në Britani, ajo e kishte bërë të qartë se nuk e shihte Afrikën e Jugut si vendin ku mund të jetonte.

“Shumë tela me gjemba, shumë qen roje. Nuk mendoj se do të mund të jetoja ndonjëherë atje”, kishte deklaruar Diana.

Brenda pak javësh, ajo dhe Hasnat Khan i dhanë fund marrëdhënies së tyre.

Ndërkohë në gusht të vitit 1997, vetëm disa muaj pas vizitës në Afrikën e Jugut, Princesha Diana humbi jetën në një aksident automobilistik në Paris, në moshën 36-vjeçare.

Vëllai i saj do të kujtonte më vonë ndarjen në aeroportin e Cape Town, duke rrëfyer se e kishte kuptuar sa e palumtur ishte motra e tij, por ishte ndier i pafuqishëm për ta ndihmuar.

Top Channel