SKANDALI I TOKËS PËR FOTOVOLTAIKËT NË FIER/ Në pranga ish-kreu i Dërmenasit, dy punonjëse të Kadastrës, noterja dhe drejtori i Spitalit të Fierit
Hetimet e SPAK kanë zbardhur një skemë të dyshuar mashtrimi dhe falsifikimi dokumentesh, që lidhet me tjetërsimin e një sipërfaqeje toke, e cila më pas do të përdorej për investime në energjinë fotovoltaike.
Në mesin e personave ndaj të cilëve është caktuar masa e sigurisë “Arrest me burg” është edhe Dilaver Shyti, ish-kreu i Njësisë Administrative Dërmenas. Gjithashtu, në këtë çështje janë përfshirë edhe dy punonjëse të Agjencisë Shtetërore të Kadastrës, Fjorelo Bida dhe Arbina Jaupaj
Masa e sigurisë “Arrest me burg” është caktuar edhe për noteren Anila Haxhiu, si dhe për Arben Vojën, aktualisht drejtor i Spitalit Rajonal të Fierit, i cili më herët ka drejtuar Zyrën e Kadastrës në Fier.
Sipas burimeve konfidenciale, dyshimet e hetuesve lidhen edhe me periudhën kur Arben Voja ishte në drejtimin e Kadastrës së Fierit. Ai dyshohet se ka qenë i përfshirë në tjetërsimin e një prone nga tokë shtetërore në pronë private, e cila më pas u është shitur investitorëve që synonin zhvillimin e projekteve fotovoltaike.
Dyshimet janë se përmes falsifikimit të dokumentacionit dhe veprimeve të kundërligjshme është synuar përfitimi financiar nga tjetërsimi i pronës.
Hetimet vijojnë për të zbardhur të gjithë mekanizmin e dyshuar, rolin e secilit prej personave të përfshirë dhe përfitimet që mund të jenë realizuar nga kjo skemë.
360grade.al
