Franca po përgatitet për një tjetër fundjavë protestash kundër rritjes së kostos së jetesës. Për të shtunën, 14 nëntor, janë paralajmëruar tubime dhe marshime në disa qytete, ndërsa autoritetet kanë planifikuar mobilizimin e deri në 70 mijë efektivëve të policisë dhe xhandarmërisë në të gjithë vendin.
Ministri i Brendshëm francez, Laurent Nunez, deklaroi për televizionin “LCI” se do të zbatohet një plan i ngjashëm me atë të fundjavës së kaluar dhe masat e vendosura që prej 24 tetorit. Numri përfundimtar i forcave të angazhuara do të rishikohet në një takim të parashikuar për 13 nëntor.
“Do të kemi të njëjtin plan angazhimi si të shtunën e kaluar”, u shpreh Nunez, duke sqaruar se bëhet fjalë për një strukturë fleksibël, e cila mund të përshtatet në varësi të zhvillimeve në terren.
Sipas ministrit, grupet që konsiderohen me rrezik për rendin publik kanë tendencë të shpërndahen në grupe të vogla dhe të shmangin masat e sigurisë. Për këtë arsye, plani parashikon një angazhim të lëvizshëm të forcave, me vëmendje të veçantë në Paris.
Protesta e 14 nëntorit do të jetë e pesta të shtunë radhazi që qytetarët dalin në rrugë kundër shtrenjtimit të jetesës. Në mobilizime marrin pjesë edhe lëvizja “Jelekët e Verdhë” dhe disa organizata rinore.
Kësaj here pritet t’u bashkohet edhe kolektivi “Enfantiste”, që kundërshton dhunën ndaj fëmijëve dhe adoleshentëve. Në protesta do të marrin pjesë gjithashtu organizata kundër një projektligji që parashikon prezumimin e përdorimit të ligjshëm të armëve nga forcat e rendit, si dhe aktivistë të mjedisit.
Përfshirja e grupeve me kauza të ndryshme dhe mobilizimi i gjerë i forcave të sigurisë e vendosin sërish Francën në gatishmëri për një ditë protestash, me kryeqytetin si një nga pikat kryesore të vëmendjes.