Petulla në xhezve me sherbet, shija që nuk do ta ndani nga tavolina nga shefja e kuzhinës Albana Mançja

Çdo ditë, në emisionin “Mes’dritë” në Vizion Plus, nën moderimin e Alma Çelajt, shefja e kuzhinës Albana Mancia sjell receta të shijshme, ide kreative dhe sugjerime për gatime që mund t’i përgatisni lehtësisht në shtëpi. Ndiqni recetat e saj dhe zbuloni çdo ditë shije të reja, hap pas hapi!

Përbërësit:

Për brumin:

300 gr miell OLA

1 bustinë vanilje

1 lugë çaji sheqer

1 lugë çaji kripë

½ filxhan çaji ujë

1 lugë gjelle uzo

1 vezë

Vaj GOLD për skuqje

Për sherbetin:

200 ml ujë

150 gr sheqer

3 lugë gjelle mjaltë

Bajame ose arra për servirje

Përgatitja:

Fillimisht përgatisim sherbetin. Në një tenxhere hedhim sheqerin dhe ujin dhe sapo uji të marrë valë e lemë 5 minuta dhe më pas shtojmë mjaltin. E largojmë tenxheren nga soba dhe e lemë të ftohet.

Ndërkohë përgatisim brumin e petullave. Hedhim miellin në një tas të madh, hapim në qendër një hapësirë ku shtojmë ujin e përzier me uzon, sheqerin, kripën dhe vaniljen. Hedhim dhe një kokërr vezë dhe e punojmë mirë brumin derisa të fitojë elasticitet. Më pas e lemë brumin të pushojë për disa minuta.

E ndajmë brumin e petullave në kuleçë të vegjël dhe më pas hapim petullat në petëza të holla. Në një xhezve çaji hedhim vaj deri në mes të xhezves. E lemë të nxehet dhe vendosim petullën e parë duke e kapur në qendër dhe duke e hedhur në xhezve të rrudhosur. E lemë të skuqet nga njëra anë dhe më pas me pirun e shtyjmë në brendësi të xhezves dhe e kthejmë nga ana tjetër. Kështu veprojmë me të gjitha petullat dhe më pas i sherbetosim. I lemë t’a përthithin mirë sherbetin dhe i servirim me bajame ose arra të thërrmuara.